കോട്ടയത്ത് ഇടിമിന്നലേറ്റ ഗജവീരൻ പല്ലാട്ട് ബ്രഹ്മദത്തൻ ചരിഞ്ഞു

കോട്ടയത്ത് ഇടിമിന്നലേറ്റ് ഗജവീരൻ പല്ലാട്ട് ബ്രഹ്മദത്തൻ ചരിഞ്ഞു. ഈരാറ്റുപേട്ട സ്വദേശി രാജേഷ് പല്ലാട്ടിന്റെ ഉടമസ്ഥതയിലുള്ള ആനയ്ക്ക് ഞായറാഴ്ച വൈകിട്ടാണ് ശക്തമായ മിന്നലേറ്റ് ഗുരുതരമായി പരിക്കേറ്റൽക്കുന്നത്. തുടർന്ന് മൃഗഡോക്ടറെത്തിയാണ് മരണം സ്ഥിരീകരിച്ചത് വീട്ടുപറമ്പിൽ തളച്ചിരുന്നപ്പോഴാണ് മിന്നൽ ഏറ്റത്.

ബിഹാറിൽ നിന്ന് കേരളത്തിലെത്തിച്ച, ഏകദേശം 10 അടി ഉയരമുള്ള ആനയ്ക്ക് 45 വയസ്സ് പ്രായമുണ്ടായിരുന്നു. കഴിഞ്ഞ 25 വർഷമായി കേരളത്തിലുണ്ടായിരുന്ന ബ്രഹ്മദത്തൻ, തൃശൂർ പൂരത്തിന് പാറമേക്കാവിന്റെ രാത്രി പൂരത്തിന് തിടമ്പേറ്റിയതടക്കം സംസ്ഥാനത്തെ വിവിധ പ്രമുഖ ക്ഷേത്രോത്സവങ്ങളിലെ സജീവ സാന്നിധ്യമായിരുന്നു.

മുൻപും സമാനമായ രീതിയിൽ കേരളത്തിൽ ഇടിമിന്നലേറ്റ് കൊളക്കാടൻ മിനി എന്ന നാട്ടാന ചരിഞ്ഞിട്ടുണ്ട്. ഇത്തരത്തിൽ കനത്ത മഴയിലും തുലാവർഷത്തിലും കേരളത്തിലെ വനമേഖലകളിലും പുറത്തും ശക്തമായ ഇടിമിന്നലിൽപ്പെട്ട് കാട്ടാനകളും മറ്റ് വന്യജീവികളും ചരിയുന്ന സംഭവങ്ങൾ മുൻപും വനംവകുപ്പ് ഔദ്യോഗികമായി സ്ഥിരീകരിച്ചിട്ടുള്ളതാണ്.

ഉയരമുള്ള ശരീരപ്രകൃതിയായതിനാലും, മഴയത്ത് ചങ്ങലകളോ വലിയ മരങ്ങളോ വഴി വൈദ്യുതി എളുപ്പത്തിൽ ആനയുടെ ശരീരത്തിലേക്ക് പ്രവഹിക്കാൻ സാധ്യതയുള്ളതിനാലും, ശക്തമായ മിന്നലേറ്റാൽ ഹൃദയസ്തംഭനമോ രക്തചക്രമണം നിലച്ചോ അവയ്ക്ക് തൽക്ഷണം മരണം സംഭവിക്കാറുണ്ട്