ഇന്നലെ പുലർച്ചെ 2.30-ഓടെ കാട്ടാക്കടയിലെ ഇവരുടെ വീട്ടിലായിരുന്നു സംഭവം. ഉറങ്ങിക്കിടക്കുമ്പോൾ കിടപ്പുമുറിയിൽ കറങ്ങിക്കൊണ്ടിരുന്ന ഫാനിന്റെ ബ്ലേഡ് അപ്രതീക്ഷിതമായി ഒടിഞ്ഞ് സപ്നയുടെ ശരീരത്തിലേക്ക് വീഴുകയായിരുന്നു. ഏകദേശം കാൽ ലക്ഷം രൂപ വിലവരുന്ന പുതിയ സീലിങ് ഫാനാണ് അപകടത്തിന് കാരണമായത്.
ഫാൻ ശരീരത്തിലേക്ക് വീണ് ഗുരുതരമായി പരിക്കേറ്റ യുവതിയെ ഉടൻ തന്നെ നഗരത്തിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇവർക്ക് വിദഗ്ധ ചികിത്സ നൽകിവരികയാണെന്നും, പരിക്ക് സംബന്ധിച്ച കൂടുതൽ വിവരങ്ങൾ ആശുപത്രി അധികൃതരിൽ നിന്ന് ഇതുവരെ ലഭ്യമായിട്ടില്ലെന്നും റിപ്പോർട്ടുകൾ വ്യക്തമാക്കുന്നു.
