ഇന്ന് പ്രവൃത്തി ദിനമായതിനാല് പലര്ക്കും ഓണത്തിനായുള്ള പൂര്ണ്ണമായ തയ്യാറെടുപ്പുകള് നടത്താന് സാധിച്ചിട്ടില്ല. നാളെ മുതല് ഓണാവധി തുടങ്ങുന്നതോടെ രാവിലെ തന്നെ ആളുകള് കൂട്ടത്തോടെ കച്ചവട കേന്ദ്രങ്ങളിലേക്ക് ഇറങ്ങും. ഇതോടെ നിരത്തുകളിലും കടകളിലും വലിയ തിരക്കാണ് പ്രതീക്ഷിക്കുന്നത്.
ഓണക്കോടി മുതല് സദ്യവട്ടത്തിനുള്ള വിഭവങ്ങള് വരെ വാങ്ങിക്കൂട്ടാനുള്ള നെട്ടോട്ടമാണ് ഉത്രാടപ്പാച്ചില്. പച്ചക്കറി കടകളിലും തുണിക്കടകളിലും മാത്രമല്ല, പൂവിപണിയിലും നാളെ വന് തിരക്കനുഭവപ്പെടും. വിലക്കുറവുകള് തേടിയും ഇഷ്ടമുള്ളവ സ്വന്തമാക്കാനും കുടുംബസമേതമാണ് പലരും ഉത്രാട ദിനത്തില് വിപണിയില് എത്തുക.
വഴിയോര കച്ചവടക്കാര്ക്കും ഉത്രാട ദിനം വലിയ പ്രതീക്ഷയുടേതാണ്. ഓണക്കാലത്ത് മാത്രം കച്ചവടം ചെയ്ത് ഉപജീവനം കണ്ടെത്തുന്ന നിരവധിപ്പേര് നിരത്തുകളിലുണ്ട്. ഇവര്ക്കെല്ലാം അവസാനത്തെ അവസരം കൂടിയാണ് നാളത്തെ ഉത്രാടപ്പാച്ചില് നല്കുന്ന വിപണിയുടെ ഉണര്വ്.
കൂടുതൽ കണ്ടെത്തുക
ഭൂമിശാസ്ത്രപരമായ മാപ്പുകൾ പരിശോധിക്കൽ
ചലച്ചിത്ര അവാർഡ് വിവരങ്ങൾ
യാത്ര വിവരങ്ങൾ
എന്നാല്, ഈ ഓണാഘോഷങ്ങള്ക്കും ഉത്രാടപ്പാച്ചിലിനും മേല് കരിനിഴല് വീഴ്ത്തിക്കൊണ്ട് സംസ്ഥാനത്ത് അതിശക്തമായ മഴ മുന്നറിയിപ്പാണ് കാലാവസ്ഥാ വകുപ്പ് നല്കുന്നത്. പല ജില്ലകളിലും ഇതിനോടകം തന്നെ മഴ കനത്തിട്ടുണ്ട്. വരും മണിക്കൂറുകളില് മഴ കൂടുതല് ശക്തമാകുമെന്ന റിപ്പോര്ട്ടുകള് ജനങ്ങളെയും വ്യാപാരികളെയും ഒരുപോലെ ആശങ്കയിലാഴ്ത്തുന്നു. സംസ്ഥാനത്ത് മഴ സജീവമായി കഴിഞ്ഞു.
ഓണം കലക്കാന് മഴ തുടരുമോ എന്ന ചോദ്യമാണ് ഇപ്പോള് എങ്ങും ഉയരുന്നത്. മഴ കനത്താല് ആളുകള് പുറത്തിറങ്ങാന് മടിക്കും. ഇത് വിപണിയെ പൂര്ണ്ണമായും തളര്ത്തും. പ്രത്യേകിച്ച് വഴിയോരത്ത് പച്ചക്കറിയും പൂക്കളും തുണിത്തരങ്ങളും വില്ക്കുന്ന ചെറുകിട കച്ചവടക്കാരെയാകും മഴ ഏറ്റവും കൂടുതല് ബാധിക്കുക. മഴ പെയ്താല് ഉത്രാടപ്പാച്ചിലിന്റെ ആവേശം കെട്ടടങ്ങുമോ എന്ന ഭയം വിപണിയിലുണ്ട്. ലക്ഷക്കണക്കിന് രൂപയുടെ സാധനങ്ങളാണ് ഓണ വിപണി ലക്ഷ്യമാക്കി വ്യാപാരികള് ഇറക്കുമതി ചെയ്തിരിക്കുന്നത്. നാളത്തെ ഒറ്റദിവസം കൊണ്ട് വിറ്റഴിക്കേണ്ട ഇവയെല്ലാം മഴ കൊണ്ടുപോകുമോ എന്ന നെഞ്ചിടിപ്പിലാണ് കേരളത്തിലെ വ്യാപാരി സമൂഹം.
പൂവിപണിയെയാണ് മഴ ഏറ്റവും കൂടുതല് പ്രതിസന്ധിയിലാക്കുന്നത്. അതിര്ത്തി കടന്നെത്തുന്ന പൂക്കള് മഴ നനഞ്ഞാല് പെട്ടെന്ന് കേടാകും. ഉത്രാട ദിനത്തില് പൂക്കള്ക്ക് ലഭിക്കേണ്ട മികച്ച വിലയും കച്ചവടവും മഴ മൂലം ഇല്ലാതാകുമോ എന്ന ഭയം പൂക്കച്ചവടക്കാര്ക്കിടയില് വ്യാപകമാണ്. മഴ മുന്നറിയിപ്പുകള്ക്കിടയിലും ഓണത്തെ വരവേല്ക്കാന് തന്നെയാണ് മലയാളികളുടെ തീരുമാനം. എന്ത് പ്രതിസന്ധിയുണ്ടായാലും തിരുവോണ സദ്യ ഗംഭീരമാക്കാന് മഴയെ വകവെയ്ക്കാതെ ആളുകള് പുറത്തിറങ്ങുമെന്ന പ്രതീക്ഷയിലാണ് വ്യാപാരികള്. കുട ചൂടിയും റെയിന്കോട്ട് ധരിച്ചും ഉത്രാടപ്പാച്ചില് നടത്തുന്ന മലയാളികളുടെ കാഴ്ചകള്ക്കും മുന്കാലങ്ങളില് കേരളം സാക്ഷ്യം വഹിച്ചിട്ടുണ്ട്.
പ്രകൃതിയുടെ മാറ്റങ്ങള് ഓണത്തിന്റെ മാറ്റു കുറയ്ക്കുമോ എന്ന് കാത്തിരുന്ന് കാണണം. മഴ പെയ്താലും ഇല്ലെങ്കിലും മലയാളിയുടെ മനസ്സിലെ ഓണാഘോഷങ്ങള്ക്ക് മങ്ങലേല്ക്കില്ല. എങ്കിലും, നാളത്തെ ഉത്രാടപ്പാച്ചിലിന് മഴ ഒരു വില്ലനായി മാറുമോ എന്ന ആശങ്ക ബാക്കിവെച്ചുകൊണ്ടാണ് ഈ ഓണക്കാലം തിരുവോണത്തിലേക്ക് കടക്കുന്നത്.
