ഈ മാസം 21-നാണ് സ്കൂളുകളിൽ ഓണാഘോഷ പരിപാടികൾ തീരുമാനിച്ചിരുന്നത്. എന്നാൽ, ഇതേ ദിവസം തന്നെ പരീക്ഷയും ക്രമീകരിച്ചിരിക്കുകയാണ് പൊതുവിദ്യാഭ്യാസ വകുപ്പ്. യഥാർത്ഥത്തിൽ 20-ാം തീയതി ഉച്ചയ്ക്ക് ശേഷം നടക്കേണ്ടിയിരുന്ന മലയാളം രണ്ടാം പേപ്പർ പരീക്ഷയാണ് 21-ാം തീയതിയിലേക്ക് പുനർക്രമീകരിച്ചത്. സർക്കാരിന്റെ ഈ നീക്കം മൂലം വിദ്യാർത്ഥികൾക്ക് സ്കൂളിലെ ഓണാഘോഷ പരിപാടികളിൽ പൂർണ്ണമായി പങ്കെടുക്കാൻ സാധിക്കാത്ത സാഹചര്യം ഉണ്ടാകുമെന്ന് പരാതി ഉയർന്നിട്ടുണ്ട്.
സർക്കാർ തീരുമാനം പുനപ്പരിശോധിക്കണമെന്ന ആവശ്യവുമായി അധ്യാപക സംഘടനയായ കെ.എസ്.ടി.എ ഉൾപ്പെടെയുള്ളവർ രംഗത്തെത്തിയിട്ടുണ്ട്. പഠനത്തോടൊപ്പം തന്നെ കുട്ടികൾക്ക് മാനസിക ഉല്ലാസവും അനിവാര്യമാണെന്നും, ആഘോഷങ്ങൾക്ക് വിഘാതമാകുന്ന ഇത്തരം നടപടികൾ വിദ്യാർത്ഥികളുടെ വളർച്ചയെ ബാധിക്കുമെന്നും സംഘടനകൾ ചൂണ്ടിക്കാട്ടുന്നു. വിദ്യാർത്ഥികളുടെ ആവേശം കെടുത്തുന്ന ഈ തീരുമാനം പിൻവലിക്കണമെന്നാണ് അധ്യാപക സംഘടനകളുടെ പ്രധാന ആവശ്യം
