തൃശൂർ അഴീക്കോട് നിന്നാണ് ഈ സംഭവം റിപ്പോർട്ട് ചെയ്യപ്പെടുന്നത്
സുനാമി ഉന്നതിയിൽ താമസിക്കുന്ന ഷിലി ആണ് മകൾ അമേയയെ ക്രൂരമായി ആക്രമിച്ചത്. ഷിലിയും ഭാര്യ ശ്രീകലയും തമ്മിൽ ദീർഘനാളുകളായി കുടുംബപ്രശ്നങ്ങൾ നിലനിന്നിരുന്നു. ഇതേത്തുടർന്ന് ഇരുവരും തമ്മിൽ വഴക്കുണ്ടാകുകയും, പനി ബാധിതയായ ശ്രീകല ആശുപത്രിയിൽ ചികിത്സ തേടുകയും ചെയ്തു. സംഭവദിവസം വൈകുന്നേരം ഷിലിയും മകൾ അമേയയും മാത്രമാണ് വീട്ടിലുണ്ടായിരുന്നത്. വീട്ടിലെ പ്രശ്നങ്ങളെക്കുറിച്ച് സംസാരിക്കുന്നതിനിടെ, അമ്മയെ പിന്തുണച്ചുകൊണ്ട് മകൾ സംസാരിച്ചത് ഷിലിയെ പ്രകോപിപ്പിക്കുകയായിരുന്നു എന്നാണ് പോലീസിന് ലഭിച്ച പ്രാഥമിക വിവരം.
പ്രകോപിതനായ ഇയാൾ വീട്ടിലുണ്ടായിരുന്ന വെട്ടുകത്തി എടുത്ത് മകളുടെ തലയ്ക്ക് വെട്ടുകയായിരുന്നു. ഗുരുതരമായി പരിക്കേറ്റ് രക്തം വാർന്നു കിടന്ന മകളെ ഉപേക്ഷിച്ച് ഇയാൾ അവിടെനിന്നും രക്ഷപ്പെട്ടു. എന്നാൽ ഒളിവിൽ പോകുന്നതിനിടെ ഒരു ബന്ധുവിനെ വിളിച്ച് മകൾക്ക് പരിക്കേറ്റിട്ടുണ്ടെന്നും ആശുപത്രിയിൽ എത്തിക്കണമെന്നും ഇയാൾ അറിയിച്ചിരുന്നു. വിവരമറിഞ്ഞ് സ്ഥലത്തെത്തിയ ബന്ധുക്കളും നാട്ടുകാരും പോലീസും ചേർന്നാണ് പെൺകുട്ടിയെ കൊടുങ്ങല്ലൂരിലെ ഒരു സ്വകാര്യ ആശുപത്രിയിൽ എത്തിച്ചത്. തലയ്ക്ക് സാരമായി പരിക്കേറ്റ അമേയ ഇപ്പോഴും ബോധം വീണ്ടെടുത്തിട്ടില്ലെന്നും അതീവ ഗുരുതരാവസ്ഥയിൽ ചികിത്സയിൽ തുടരുകയാണെന്നുമാണ് റിപ്പോർട്ടുകൾ. ഒളിവിൽ പോയ പ്രതി ഷിലിയെ കൊടുങ്ങല്ലൂരിനടുത്തുള്ള വെമ്പല്ലൂരിൽ വെച്ച് പോലീസ് കസ്റ്റഡിയിലെടുത്തു. പോലീസ് സ്റ്റേഷനിൽ എത്തിച്ച ഇയാളെ ഇപ്പോൾ വിശദമായി ചോദ്യം ചെയ്തുവരികയാണ്.
