ഏകദേശം ₹12,595 കോടി ചെലവ് പ്രതീക്ഷിക്കുന്ന പദ്ധതി ആക്സസ് കൺട്രോൾഡ് ഹൈവേയായാണ് വികസിപ്പിക്കുന്നത്. 17 തുരങ്കങ്ങളും 50 വിയാഡക്ടുകളും ഉൾപ്പെടുന്ന റോഡിന് സാധാരണയായി 45 മീറ്റർ വീതിയുണ്ടാകും. ഏഴ് പ്രധാന ജംഗ്ഷനുകളിൽ ഇത് 60 മീറ്റർ വരെയാകും. വിഴിഞ്ഞത്തും നാവായിക്കുളത്തും ക്ലോവർലീഫ് ഇന്റർചേഞ്ചുകളും പദ്ധതിയുടെ ഭാഗമാണ്. ഭൂമി ഏറ്റെടുക്കൽ ചെലവിന്റെ 50 ശതമാനം സംസ്ഥാന സർക്കാർ വഹിക്കും.
പരിസ്ഥിതി സംരക്ഷണം മുൻനിർത്തി കുന്നുകൾ വൻതോതിൽ വെട്ടിമാറ്റുന്നത് ഒഴിവാക്കുന്നതിനാണ് പുതുക്കിയ അലൈൻമെന്റിൽ തുരങ്കങ്ങൾ ഉൾപ്പെടുത്തിയിരിക്കുന്നത്. നാല് വർഷത്തിലേറെയായി മുടങ്ങിക്കിടക്കുന്ന പദ്ധതിക്ക് പരിസ്ഥിതി അനുമതിയിലേക്കുള്ള വഴി തുറന്നതോടെ സംസ്ഥാന മന്ത്രിസഭയുടെ അംഗീകാരത്തിന് ശേഷമുള്ള തുടർനടപടികൾ വേഗത്തിലാകുമെന്നാണ് പ്രതീക്ഷ. പദ്ധതി പൂർത്തിയാകുന്നതോടെ തിരുവനന്തപുരം അന്താരാഷ്ട്ര തുറമുഖത്തെ കേന്ദ്രീകരിച്ചുള്ള ലോജിസ്റ്റിക്സ്, വ്യവസായം, വ്യാപാരം തുടങ്ങിയ മേഖലകളുടെ വികസനത്തിന് തലസ്ഥാന മേഖലയിൽ പുതിയ സാധ്യതകൾ തുറക്കുമെന്നാണ് വിലയിരുത്തൽ.
വിഴിഞ്ഞം മുതൽ നാവായിക്കുളം വരെ 62.7 കിലോമീറ്റർ തിരുവനന്തപുരം ഔട്ടർ റിംഗ് റോഡിന് പരിസ്ഥിതി അനുമതി. പുതുക്കിയ അലൈൻമെന്റിന്റെ ഭൂമിശാസ്ത്ര, സുരക്ഷാ വശങ്ങൾ സംബന്ധിച്ച് NHAI സമർപ്പിച്ച റിപ്പോർട്ട് പരിഗണിച്ച ശേഷമാണ് അനുമതി ലഭിച്ചത്.
