ശരിയായ രീതിയിലല്ലാതെ മണിക്കൂറുകളോളം കിടന്നുകൊണ്ട് ഫോൺ ഉപയോഗിച്ചതാണ് രോഗാവസ്ഥ വഷളാക്കിയതെന്ന് ഷക്കീല പറയുന്നു. കട്ടിലിൽ ഒരു വശത്തേക്ക് ചരിഞ്ഞുകിടന്ന് മൂന്നും നാലും മണിക്കൂറോളം തുടർച്ചയായി ഗെയിം കളിക്കുകയും റീൽസ് കാണുകയും ചെയ്യാറുണ്ടായിരുന്നു. തെറ്റായ പോസ്ചറിലുള്ള കിടപ്പ് കഴുത്തിലെ പ്രധാന ഞരമ്പുകളെ ബാധിച്ചതോടെയാണ് ശസ്ത്രക്രിയ വേണ്ടിവന്നത്.
ശസ്ത്രക്രിയയ്ക്കായി മൂന്ന് ലക്ഷത്തോളം രൂപ ചെലവായെന്നും നിലവിൽ ഭക്ഷണം കഴിക്കാനും എഴുന്നേൽക്കാനും പോലും മറ്റുള്ളവരുടെ സഹായം വേണമെന്നും ഷക്കീല പറഞ്ഞു. അനാവശ്യമായി ഫോൺ ഉപയോഗിച്ച് സമയം കളയരുതെന്നും കുട്ടികൾക്ക് ഫോൺ നൽകരുതെന്നും ആരാധകർക്ക് മുന്നറിയിപ്പ് നൽകിയ താരം, ഫോൺ ആവശ്യത്തിന് മാത്രം ഉപയോഗിക്കണമെന്നും അഭ്യർത്ഥിച്ചു.
2000-ൽ പുറത്തിറങ്ങിയ ‘കിന്നാരത്തുമ്പികൾ’ എന്ന ചിത്രത്തിലൂടെയാണ് ഷക്കീല ശ്രദ്ധ നേടുന്നത്. 12 ലക്ഷം രൂപ ബജറ്റിൽ നിർമിച്ച ചിത്രം 4 കോടിയിലധികം കളക്ഷൻ നേടി വൻ വിജയമായിരുന്നു. പിന്നീട് മലയാളത്തിന് പുറമെ തമിഴ്, തെലുങ്ക്, കന്നഡ ഭാഷകളിലും സജീവമായ താരം ‘ഛോട്ടാ മുംബൈ’, ‘തേജാഭായ് ആന്റ് ഫാമിലി’, ‘അഴകിയ തമിഴ് മകൻ’, ‘ശിവ മനസുല ശക്തി’ തുടങ്ങി നിരവധി ഹിറ്റ് ചിത്രങ്ങളുടെ ഭാഗമായിട്ടുണ്ട്.
