ആദ്യ ഇന്നിങ്സിലെ സെഞ്ച്വറി പ്രകടനത്തിന് പിന്നാലെ രണ്ടാം ഇന്നിങ്സിലും നിർണായക സംഭാവന നൽകിയ ദേവ്ദത്ത് പടിക്കലാണ് മത്സരത്തിലെ താരം. ആദ്യ ഇന്നിങ്സിൽ പടിക്കലിന്റെ സെഞ്ച്വറി മികവിൽ ഇന്ത്യ 462 റൺസ് നേടിയിരുന്നു. കെ.എൽ. രാഹുൽ 82 റൺസും ധ്രുവ് ജുറേൽ 51 റൺസും നേടി അർധസെഞ്ച്വറി പൂർത്തിയാക്കി. ശ്രീലങ്കയ്ക്കായി പ്രഭാത് ജയസൂര്യ നാല് വിക്കറ്റ് വീഴ്ത്തി.
മറുപടി ഇന്നിങ്സിൽ നിഷാൻ മധുഷ്ക പൂജ്യത്തിന് പുറത്തായെങ്കിലും സോനൽ ദിനുഷയുടെ സെഞ്ച്വറി പ്രകടനത്തിലൂടെ ലങ്ക തിരിച്ചുവരവിന് ശ്രമിച്ചു. എന്നാൽ ഇന്ത്യൻ ബോളർമാർ തുടർച്ചയായി വിക്കറ്റുകൾ വീഴ്ത്തിയതോടെ ലങ്കൻ ഇന്നിങ്സ് തകർന്നു. മാനവ് സുതർ നാല് വിക്കറ്റും രവീന്ദ്ര ജഡേജ മൂന്ന് വിക്കറ്റും നേടി. മുഹമ്മദ് സിറാജ്, പ്രസിദ് കൃഷ്ണ, കുൽദീപ് യാദവ് എന്നിവർ ഓരോ വിക്കറ്റ് വീതവും വീഴ്ത്തി.
രണ്ടാം ഇന്നിങ്സിൽ യശസ്വി ജയ്സ്വാളിനെ പൂജ്യത്തിന് പുറത്താക്കി ശ്രീലങ്ക ഇന്ത്യയെ സമ്മർദത്തിലാക്കാൻ ശ്രമിച്ചു. എന്നാൽ പടിക്കൽ വീണ്ടും രക്ഷകനായി. 75 പന്തിൽ ആറ് ഫോറുകളടക്കം 44 റൺസ് നേടിയ താരം ഇന്നിങ്സിന് അടിത്തറയിട്ടു. കെ.എൽ. രാഹുൽ 35 റൺസും റിഷഭ് പന്ത് 66 റൺസും നേടിയതോടെ ഇന്ത്യ 371/372 റൺസ് വിജയലക്ഷ്യം മുന്നോട്ടുവച്ചു.
വിജയലക്ഷ്യം പിന്തുടർന്ന ലങ്കയ്ക്കായി സോനൽ ദിനുഷയാണ് മികച്ച പ്രകടനം പുറത്തെടുത്തത്. 128 പന്തിൽ 84 റൺസ് നേടിയ താരം ഒരറ്റത്ത് ഉറച്ചുനിന്നെങ്കിലും നായകൻ ധനഞ്ജയ ഡി സിൽവയ്ക്ക് മാത്രമാണ് കാര്യമായ പിന്തുണ നൽകാനായത്. അഞ്ച് താരങ്ങൾ ഒറ്റയക്കത്തിൽ പുറത്തായതോടെ ലങ്കയുടെ പോരാട്ടം 206 റൺസിൽ അവസാനിച്ചു. ഇന്ത്യക്ക് 165 റൺസിന്റെ ആധികാരിക ജയം.
