തന്റെ പത്താം വയസ്സിൽ അച്ഛൻ സ്നേഹത്തോടെ സമ്മാനിച്ചതാണ് ഈ സൈക്കിൾ. അച്ഛന്റെ ചരമവാർഷികത്തിന്റെ തലേദിവസം തന്നെ സൈക്കിൾ നഷ്ടപ്പെട്ടത് ആ കുടുംബത്തെ വലിയ രീതിയിൽ വേദനിപ്പിച്ചിരുന്നു. വാർത്തകളിലൂടെ ഈ സംഭവമറിഞ്ഞതോടെയാണ് കള്ളന് വാഗ്ദാനവുമായി ബോബി ചെമ്മണ്ണൂർ രംഗത്തെത്തിയത്. ആ സൈക്കിളിന്റെ വൈകാരിക മൂല്യം മനസ്സിലാക്കി അത് തിരികെ ഏൽപ്പിക്കുകയാണെങ്കിൽ അഞ്ച് ലക്ഷം രൂപ പാരിതോഷികമായി നൽകുമെന്നും, തെറ്റുതിരുത്തി നല്ലൊരു ജീവിതം നയിക്കാൻ തയ്യാറാകുകയാണെങ്കിൽ കള്ളന് മികച്ചൊരു ജോലി നൽകുമെന്നും അദ്ദേഹം അറിയിച്ചു.
വെറുമൊരു ഇരുമ്പുചക്രത്തിനപ്പുറം പ്രകാശൻ എന്ന എൺപതുകാരന്റെ അച്ഛനോർമ്മകളുടെ സുഗന്ധമുള്ള ആ പഴയ സൈക്കിൾ തിരികെ നൽകി അദ്ദേഹത്തിന്റെ വേദന ശമിപ്പിക്കാൻ കള്ളൻ തയ്യാറാകുമോ എന്നാണ് ഏവരും ഉറ്റുനോക്കുന്നത്.
