കർണാടക ബി.സി റോഡിൽ കല്ലഡ്കയിലെ സ്വകാര്യ ആശുപത്രിയിലെ ജോലി കഴിഞ്ഞ്, വീട്ടിലേക്ക് മടങ്ങാൻ ബസിൽ ഇരിക്കുകയായിരുന്ന ലാവണ്യ ഗൗഡ എന്ന ഇരുപത്തിയേഴുകാരിയെയാണ് ചോരക്കണ്ണുകളോടെ വന്ന ഒരുവൻ ക്രൂരമായി കൊലപ്പെടുത്തിയത്.
അകന്ന ബന്ധുവായ ചേതൻ എന്ന യുവാവിന്റെ അന്ധമായ പ്രണയത്തോടും വിവാഹാഭ്യർത്ഥനയോടും 'നോ' എന്ന് ലാവണ്യ പറഞ്ഞതായിരുന്നു അവൾ ചെയ്ത തെറ്റ്.
ആ ഒരു 'നോ' പറഞ്ഞതിന്റെ പേരിൽ, ഒരു നാടിന്റെ മുഴുവൻ പ്രതീക്ഷയായിരുന്ന മകളെയാണ് മാതാപിതാക്കൾക്ക് നഷ്ടമായത്.
വ്യാഴാഴ്ച വൈകുന്നേരം പതിവുപോലെ ജോലി കഴിഞ്ഞ് ബസിൽ കയറിയിരുന്ന ലാവണ്യയെ എല്ലാവരും നോക്കിനിൽക്കെ പ്രതി ബസിൽ നിന്ന് ക്രൂരമായി പുറത്തേക്ക് വലിച്ചിറക്കുകയായിരുന്നു.
കൈയിൽ കരുതിയിരുന്ന വെട്ടുകത്തി കൊണ്ട് അവളുടെ ജീവനെടുത്തു. ശരീരമാസകലം മാരകമായി വെട്ടേറ്റ് ചോരയിൽ കുളിച്ചു കിടന്ന ആ പെൺകുട്ടിയെ ഓടിക്കൂടിയവർ ഉടൻ തന്നെ ബണ്ട്വാൾ താലൂക്ക് ആശുപത്രിയിൽ എത്തിച്ചെങ്കിലും, പാതിവഴിയിൽ വെച്ചുതന്നെ ആ ജീവൻ പൊലിഞ്ഞിരുന്നു.
കൃത്യം നിർവ്വഹിച്ച ശേഷം പ്രതി സംഭവസ്ഥലത്തുനിന്നും കാറിൽ കയറി രക്ഷപ്പെട്ടു. പ്രതി ഓടിപ്പോകുന്ന ഭയപ്പെടുത്തുന്ന ദൃശ്യങ്ങൾ ഇപ്പോൾ സോഷ്യൽ മീഡിയയിൽ പ്രചരിക്കുന്നുണ്ട്.
സ്വന്തം മകളുടെ ചേതനയറ്റ ശരീരം കണ്ട് തകർന്നുപോയ മാതാപിതാക്കളുടെ കണ്ണീരിനു മുന്നിൽ പകച്ചുനിൽക്കുകയാണ് ഒരു നാട് മുഴുവൻ. പ്രതി ചേതനായി കർണാടക പോലീസ് തിരച്ചിൽ ഊർജ്ജിതമാക്കിയിട്ടുണ്ട്.
ഈ ചോരപ്പകയ്ക്ക് എന്ന് അവസാനമുണ്ടാകും എന്ന ചോദ്യം ബാക്കിയാക്കി, ലാവണ്യ ഇനി നോവുന്ന ഒരു ഓർമ്മ മാത്രം.
