ജീവിതം എപ്പോൾ എങ്ങനെ മാറിമറിയുമെന്ന് ആർക്കും പ്രവചിക്കാനാകില്ല. ജോലി കഴിഞ്ഞ് പതിവുപോലെ എടിഎമ്മിൽ പണമിടപാട് നടത്താൻ കയറിയ ബാങ്ക് ജീവനക്കാരന് അത് ജീവിതത്തിലെ അവസാന നിമിഷങ്ങളാകുമെന്ന് ആരും കരുതിയിരുന്നില്ല.
കാഞ്ഞങ്ങാട് സ്വദേശിയും കർണാടക കോപ്പറേറ്റീവ് ബാങ്കിലെ അറ്റൻഡറുമായ ബാലകൃഷ്ണൻ (56)ആണ് ദാരുണമായി മരിച്ചത്. ജോലി കഴിഞ്ഞ് സമീപത്തെ എടിഎം കൗണ്ടറിലേക്ക് പണമിടപാടിനായി കയറിയ ബാലകൃഷ്ണൻ, അകത്ത് വെച്ച് തെന്നിവീണ് തലയിടിക്കുകയായിരുന്നു. വീഴ്ചയ്ക്കിടെ എടിഎം കൗണ്ടറിന്റെ ഗ്ലാസ് പൊട്ടി കൈയിലേക്ക് പതിച്ചതോടെ ഗുരുതരമായി പരിക്കേറ്റു.
ഏറ്റവും വേദനിപ്പിക്കുന്ന കാര്യം, സംഭവം നടന്ന ഉടൻ ആരുടെയും ശ്രദ്ധയിൽപ്പെട്ടില്ല എന്നതാണ്. കുറച്ച് സമയത്തിന് ശേഷം എടിഎമ്മിന് സമീപത്തുകൂടി പോയവരാണ് രക്തത്തിൽ കിടക്കുന്ന ബാലകൃഷ്ണനെ കണ്ടത്. ഉടൻ ആശുപത്രിയിലെത്തിച്ചെങ്കിലും ചികിത്സയ്ക്കിടെ രാത്രി 11 മണിയോടെ മംഗളൂരു വെൻലോക് ആശുപത്രിയിൽ വെച്ച് അദ്ദേഹം മരണത്തിന് കീഴടങ്ങി.
മംഗളൂരുവിൽ താമസിച്ചായിരുന്നു ബാലകൃഷ്ണന്റെ ജോലി. ആഴ്ചയിൽ ഒരു ദിവസം മാത്രം സ്വന്തം നാടായ കാഞ്ഞങ്ങാട്ടേക്ക് എത്താറുള്ള അദ്ദേഹത്തിന്റെ അപ്രതീക്ഷിത വിയോഗം കുടുംബത്തെയും സുഹൃത്തുക്കളെയും നാടിനെയും കണ്ണീരിലാഴ്ത്തി..
ഒരു സാധാരണ ജോലി ദിവസം... ഒരു ചെറിയ പണമിടപാട്... പക്ഷേ അതിനിടയിൽ സംഭവിച്ച അപ്രതീക്ഷിത ദുരന്തം ഒരു കുടുംബത്തിന്റെ പ്രിയപ്പെട്ടവനെ എന്നെന്നേക്കുമായി നഷ്ടമാക്കി.
