യുവതി ഇതിന് മുൻപും ഭർത്താവിൽ നിന്ന് മർദനമേറ്റിരുന്നുവെന്ന് വാർഡ് മെമ്പർ പറഞ്ഞു. 5 മാസം മുൻപ് ഇതുമായി ബന്ധപ്പെട്ട പരാതി ലഭിച്ചിരുന്നുവെന്നും മർദിച്ചതിന്റെ ദൃശ്യങ്ങളും മറ്റും അമ്മയ്ക്ക് അയച്ചുകൊടുത്തിരുന്നു. 7 മാസത്തിന് മുൻപാണ് ആരതിയും ഭർത്താവും ഇവിടേക്ക് താമസത്തിനായി വരുന്നത്. ആരതിയുടെ 50 പവനോളം വരുന്ന സ്വർണ്ണം ഭരതന്നൂർ സ്വദേശിയായ ഭർത്താവ് അതുൽ പണയം വെക്കുകയും മറ്റും ചെയ്തിരുന്നു. ഒന്നരവർഷം മുൻപാണ് ആരതിയുടെ വിവാഹം നടന്നത്.
കല്യാണം കഴിഞ്ഞ് ആറുമാസം പിന്നിട്ടപ്പോൾ ഉപദ്രവം തുടങ്ങിയതായി കുടുംബം പറയുന്നു. ഭർത്താവ് അതുൽ തന്നെ ഉപദ്രവിച്ച് മുറിവേൽപ്പിച്ച് ദൃശ്യങ്ങൾ ആരതി അമ്മയ്ക്ക് അയച്ചു നൽകിയിരുന്നു. നിലവിൽ മൃതദേഹത്തിന്റെ ഇൻക്വസ്റ്റ് നടപടികൾ തുടരുകയാണ്. പോസ്റ്റ്മോർട്ടത്തിനായി അൽപ സമയത്തിനകം തിരുവനന്തപുരം മെഡിക്കൽ കോളജിലേക്ക് മാറ്റും.
തിരുവനന്തപുരം ആറ്റുകാലിൽ വാടകവീട്ടിൽ 26-കാരിയായ യുവതിയെ തൂങ്ങി മരിച്ച നിലയിൽ കണ്ടെത്തിയ സംഭവം ദുഃഖമുണർത്തുന്നു. വർക്കല സ്വദേശിനിയായ ആരതിയാണ് മരിച്ചത്.
ഭർത്താവിന്റെ നിരന്തരമായ മാനസികവും ശാരീരികവുമായ പീഡനമാണ് ആത്മഹത്യയിലേക്ക് നയിച്ചതെന്നാണ് യുവതിയുടെ കുടുംബത്തിന്റെ ഗുരുതര ആരോപണം.
ഒന്നര വർഷം മുൻപാണ് ആരതിയും അതുലും വിവാഹിതരായത്. വിവാഹസമയത്ത് ആരതിക്ക് കുടുംബം നൽകിയിരുന്ന 50 പവൻ സ്വർണം ഭർത്താവ് വിവിധ ഘട്ടങ്ങളിലായി പണയംവെക്കുകയും പിന്നീട് ഏകദേശം എട്ട് ലക്ഷം രൂപയ്ക്ക് വിറ്റ് കാർ വാങ്ങുകയും ചെയ്തിരുന്നുവെന്നാണ് ബന്ധുക്കളുടെ ആരോപണം. ഇതേ ചൊല്ലി ഇരുവരും തമ്മിൽ പതിവായി തർക്കമുണ്ടായിരുന്നുവെന്നും നാട്ടുകാരും ബന്ധുക്കളും പറയുന്നു.
പിന്നീട് വീണ്ടും പണം ആവശ്യപ്പെട്ട് അതുൽ ആരതിയെ നിരന്തരം ഉപദ്രവിച്ചിരുന്നതായും കുടുംബം ആരോപിക്കുന്നു. ഭർത്താവ് ശാരീരികമായി മർദിച്ചതിന്റെ ചിത്രങ്ങൾ ആരതി മരണത്തിന് മുമ്പ് സ്വന്തം അമ്മയ്ക്ക് അയച്ചുനൽകിയിരുന്നുവെന്നും, അവ ഇപ്പോൾ അന്വേഷണത്തിലെ പ്രധാന തെളിവുകളിലൊന്നായി പൊലീസ് പരിശോധിച്ചുവരികയാണെന്നും വിവരമുണ്ട്.
സംഭവത്തിന് തലേദിവസവും ഇരുവരും തമ്മിൽ തർക്കമുണ്ടായിരുന്നുവെന്നാണ് വിവരം. തുടർന്ന് ഭർത്താവ് വീട്ടിൽ നിന്ന് പുറത്തുപോയതിനു പിന്നാലെയാണ് ആരതിയെ തൂങ്ങി മരിച്ച നിലയിൽ കണ്ടെത്തിയത്.
സംഭവത്തിൽ പൊലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചിട്ടുണ്ട്. മൃതദേഹത്തിന്റെ ഇൻക്വസ്റ്റ് നടപടികൾ പുരോഗമിക്കുകയാണ്. കുടുംബം ഉന്നയിച്ച പീഡനാരോപണങ്ങൾ ഉൾപ്പെടെ എല്ലാ സാഹചര്യങ്ങളും വിശദമായി പരിശോധിച്ച ശേഷമായിരിക്കും തുടർനടപടികളെന്ന് പൊലീസ് അറിയിച്ചു.
