മലപ്പുറം, വയനാട് ജില്ലകളിൽ ഓറഞ്ച് അലർട്ടും മറ്റ് ഒമ്പത് ജില്ലകളിൽ യെല്ലോ അലർട്ടും നിലവിലുണ്ട്. വടക്കൻ കേരളത്തിൽ പുലർച്ചെ മുതൽ ആരംഭിച്ച കനത്ത മഴ പല പ്രദേശങ്ങളിലും തുടരുകയാണ്.
കോഴിക്കോട് ജില്ലയിലെ വിവിധ ഭാഗങ്ങളിൽ ശക്തമായ കാറ്റിലും മഴയിലും നാശനഷ്ടങ്ങൾ ഉണ്ടായി. ഉള്ളേരി കരീറ്റുംപുറത്ത് ശക്തമായ കാറ്റിൽ തെങ്ങും മരവും കടപുഴകി വീടിന് മുകളിലേക്ക് വീണു. കരീറ്റുംപുറം സ്വദേശി പ്രേംകുമാറിന്റെ വീടിനാണ് കേടുപാടുകൾ സംഭവിച്ചത്. അപകടസമയത്ത് വീട്ടിലുണ്ടായിരുന്നവർ അത്ഭുതകരമായി രക്ഷപ്പെട്ടു.
തെക്കൻ കേരളത്തിലും മഴയ്ക്കൊപ്പം വീശുന്ന ശക്തമായ കാറ്റ് ജനജീവിതത്തെ ബാധിക്കുന്നുണ്ട്. കോട്ടയം കടനാട് കുടുംബാരോഗ്യ കേന്ദ്രത്തിന് മുന്നിൽ രാവിലെ കൂറ്റൻ മരം കടപുഴകി വീണതോടെ വൈദ്യുതി ലൈനുകൾ തകരുകയും പ്രദേശത്തെ വൈദ്യുതി ബന്ധം തടസ്സപ്പെടുകയും ചെയ്തു. ഫയർഫോഴ്സും കെ.എസ്.ഇ.ബി ഉദ്യോഗസ്ഥരും ചേർന്ന് മരം മുറിച്ചുമാറ്റാനുള്ള നടപടികൾ ആരംഭിച്ചിട്ടുണ്ട്.
തീരദേശ, മലയോര മേഖലകളിൽ പ്രത്യേക ജാഗ്രത പാലിക്കണമെന്ന് സംസ്ഥാന ദുരന്തനിവാരണ അതോറിറ്റി നിർദേശിച്ചു. വരും മണിക്കൂറുകളിലും മഴയുടെ ശക്തി വർധിക്കാൻ സാധ്യതയുള്ളതിനാൽ ജനങ്ങൾ ഔദ്യോഗിക മുന്നറിയിപ്പുകൾ കർശനമായി പാലിക്കണമെന്നും അധികൃതർ അറിയിച്ചു.
