എറണാകുളം ജില്ലയിലെ വിവിധ പ്രദേശങ്ങളിലും ശക്തമായ മഴ പെയ്തു. കനത്ത മഴയെ തുടർന്ന് പല റോഡുകളിലും ഗതാഗത തടസ്സം അനുഭവപ്പെട്ടു. ഇടുക്കി ജില്ലയിൽ ഒറ്റപ്പെട്ട സ്ഥലങ്ങളിൽ ശക്തമായ മഴയാണ് റിപ്പോർട്ട് ചെയ്തത്. വാളറ പ്രദേശത്ത് നിരവധി സ്ഥലങ്ങളിൽ മരങ്ങൾ വീണ് ഗതാഗതം തടസ്സപ്പെട്ടു.
തൊടുപുഴ നഗരത്തിൽ മഴ കുറഞ്ഞതായിരുന്നെങ്കിലും സമീപ പ്രദേശങ്ങളിൽ ശക്തമായ മഴ ലഭിച്ചു. വയനാട്യിലെ പൂതാടി പഞ്ചായത്തിൽ ശക്തമായ കാറ്റിനൊപ്പം മഴയും ആലിപ്പഴവർഷവും ഉണ്ടായി. പാപ്ലശ്ശേരി, അഴീക്കോട് നഗർ മേഖലകളിൽ വൈകിട്ട് മൂന്ന് മണിയോടെയാണ് കനത്ത മഴ അനുഭവപ്പെട്ടത്.
ഇന്ത്യൻ കാലാവസ്ഥ വകുപ്പ് മുന്നറിയിപ്പനുസരിച്ച് ഇടുക്കി, എറണാകുളം, വയനാട് ജില്ലകളിൽ ഒറ്റപ്പെട്ട ഇടങ്ങളിൽ ഇടിമിന്നലോടുകൂടിയ മഴയ്ക്കും മണിക്കൂറിൽ 40 കിലോമീറ്റർ വരെ വേഗതയിൽ കാറ്റിനും സാധ്യതയുണ്ട്. കണ്ണൂർ, കാസർകോട് ജില്ലകളിലും മഴയ്ക്ക് സാധ്യതയുണ്ടെന്ന് മുന്നറിയിപ്പിൽ പറയുന്നു
