യുദ്ധം തുടങ്ങുന്നതിന് മുൻപേ ഖമനെയിയെ ലക്ഷ്യമാക്കാൻ രാഷ്ട്രീയ അനുമതി നൽകിയിരുന്നുവെന്നും റിപ്പോര്ട്ട്. ഇറാൻ്റെ രഹസ്യാന്വേഷണ വിഭാഗത്തിലടക്കം മൊസാദിൻ്റെ ചാരൻമാർ കയറിക്കൂടിയിരുന്നു. പൊതുവേ ബങ്കറുകൾ ഉപയോഗിക്കാതിരുന്ന ഖമനെയി, ആക്രമണ ഭീഷണി ഉയർന്നതിനു പിന്നാലെ രണ്ട് ബങ്കറുകളിൽ മാറിമാറി താമസിച്ചിരുന്നുവെന്നാണ് വിവരം. യുദ്ധം തുടങ്ങിയാൽ ബങ്കറിലേക്ക് മാറുമെന്ന കണക്കുകൂട്ടലിൽ തുടക്കത്തിലേ ഖമനെയിയെ ലക്ഷ്യമിട്ടുവെന്നാണ് റിപ്പോർട്ടുകൾ വ്യക്തമാക്കുന്നത്. ജൂണിലെ യുദ്ധത്തിൽ ഖമനെയിയെ വധിക്കാൻ ശ്രമിച്ചിരുന്നില്ലെന്നും റിപ്പോർട്ടുകള് വ്യക്തമാക്കുന്നു.
ശനിയാഴ്ച പാസ്ചർ സ്ട്രീറ്റിലെ ഓഫീസിൽ നിർണായക യോഗം ഉണ്ടെന്ന രഹസ്യവിവരം യുഎസ് രഹസ്യാന്വേഷണ ഏജൻസി സിഐഎക്ക് ലഭിച്ചതായും, ഇസ്രായേലിന്റെ മൊസാദ് ഈ വിവരം സ്ഥിരീകരിച്ചതായും റിപ്പോർട്ടുകളുണ്ട്. ഇറാൻ ഉന്നത ഉദ്യോഗസ്ഥരടക്കം ഈ യോഗത്തിൽ പങ്കെടുക്കുമെന്ന് വ്യക്തമായതോടെയാണ് അർധരാത്രി നടത്താനിരുന്ന ആക്രമണം രാവിലെ തന്നെ നടത്താൻ തീരുമാനിച്ചത്. അനുമതി ലഭിച്ചതോടെ ഖമനെയിയുടെ ഓഫിസിലേക്ക് ചെറിയ ലക്ഷ്യങ്ങളിൽ പോലും അതീവ കൃത്യതയോടെ നാശമുണ്ടാക്കുന്ന 'ബ്ലു സ്പാരോ' മിസൈൽ അടക്കം പ്രയോഗിച്ചു.
ശനിയാഴ്ച പുലർച്ചെയാണ് ആയത്തുല്ല അലി ഖമനെയി കൊല്ലപ്പെട്ടത്. ഖമനെയി കൊല്ലപ്പെട്ടെന്ന് അമേരിക്കൻ പ്രസിഡന്റ് ട്രംപും ഇസ്രയേലും പ്രഖ്യാപിച്ച് മണിക്കൂറുകള്ക്ക് ശേഷമാണ് ഇറാൻ മാധ്യമങ്ങള് ഇക്കാര്യം സ്ഥിരീകരിക്കുന്നത്. ആക്രമണത്തിൽ പരിക്കേറ്റ് ചികിത്സയിലായിരുന്ന ഖമനെയിയുടെ ഭാര്യ മൻസൂറ ഖൊജസ്തേ ഇന്നലെയാണ് മരിച്ചത്. ഖമേനിയുടെ മകൾ, പേരക്കുട്ടി, മരുമകൻ, മരുമകൾ എന്നിവരും ആക്രമണത്തിൽ കൊല്ലപ്പെട്ടിരുന്നു.
