കഴിഞ്ഞ പത്താം തീയതി ചടയമംഗലത്ത് വെച്ചുണ്ടായ വാഹനാപകടത്തിലാണ് ബിനുവിന് ഗുരുതരമായി പരുക്കേറ്റത്. തുടർന്ന് ചികിത്സയിലായിരുന്ന അദ്ദേഹത്തിന്റെ മസ്തിഷ്ക മരണം കഴിഞ്ഞ ദിവസം വൈകുന്നേരത്തോടെ ഡോക്ടർമാർ സ്ഥിരീകരിച്ചു. ദുഃഖത്തിനിടയിലും ബിനുവിന്റെ കരൾ, വൃക്കകൾ, കോർണിയ എന്നിവ ദാനം ചെയ്യാൻ ബന്ധുക്കൾ സമ്മതം അറിയിക്കുകയായിരുന്നു.
നിലവിൽ തിരുവനന്തപുരം കിംസ് ആശുപത്രിയിൽ അവയവങ്ങൾ പുറത്തെടുക്കാനുള്ള ശസ്ത്രക്രിയകൾ പുരോഗമിക്കുകയാണ്. രാവിലെ ഒൻപത് മണിയോടെ ശസ്ത്രക്രിയകൾ പൂർത്തിയാകും. ബിനുവിന്റെ കരൾ, വൃക്കകൾ, കോർണിയ എന്നിവ തിരുവനന്തപുരം മെഡിക്കൽ കോളേജ് ആശുപത്രി, കിംസ് ആശുപത്രി, റീജിയണൽ ഇൻസ്റ്റിറ്റ്യൂട്ട് ഓഫ് ഒഫ്താൽമോളജി (കണ്ണാശുപത്രി) എന്നിവിടങ്ങളിൽ ചികിത്സയിൽ കഴിയുന്നവർക്കാണ് നൽകുന്നത്.
നാടിന്റെ പ്രിയപ്പെട്ടവനായിരുന്ന ബിനുവിന്റെ ഈ അവസാന യാത്ര മറ്റുള്ളവർക്ക് പ്രകാശവും ജീവനും പകർന്നുനൽകുന്ന ഒന്നായി മാറി.
