ഒരു കുടുംബത്തിന്റെ മുഴുവൻ പ്രതീക്ഷകളും ചുമലിലേറ്റിയാണ് പീച്ചി മയിലാടുംപാറ സ്വദേശിയായ ഷിജോ ഇന്നലെ വൈകുന്നേരം തന്റെ ആടുകളുമായി വനത്തിലേക്ക് പോയത്. എന്നാൽ ആ യാത്ര ഷിജോയുടെ അവസാന യാത്രയാകുമെന്ന് ആരും കരുതിയില്ല. നേരം ഇരുട്ടിയിട്ടും പ്രിയപ്പെട്ടവൻ തിരിച്ചെത്താത്തതിനെത്തുടർന്ന് നടത്തിയ തിരച്ചിലിനൊടുവിൽ കണ്ടത് കാട്ടാനയുടെ ആക്രമണത്തിൽ പൊലിഞ്ഞുപോയ ആ ജീവനറ്റ ശരീരമാണ്.
വനത്തിലെ ചെളിക്കുഴി ഭാഗത്ത് വെച്ചാണ് ആനയുടെ ആക്രമണമുണ്ടായത്. വെറും 35 വയസ്സ് മാത്രം പ്രായമുള്ള ഷിജോയുടെ അപ്രതീക്ഷിത മരണം ഒരു ഗ്രാമത്തെ ഒന്നടങ്കം കണ്ണീരിലാഴ്ത്തിയിരിക്കുകയാണ്. വന്യജീവി ശല്യം ഓരോ ദിവസവും വർദ്ധിച്ചുവരുന്ന പീച്ചി മേഖലയിൽ, മറ്റൊരു ജീവൻ കൂടി ഈ വിധത്തിൽ പൊലിയേണ്ടി വന്നത് ഏറെ വേദനാജനകമാണ്. ഷിജോയുടെ വിയോഗത്തിൽ കുടുംബത്തിനുണ്ടായ തീരാനഷ്ടത്തിൽ നമുക്കും പങ്കുചേരാം.
