ഹൃദയം തുളച്ച് വെടിയുണ്ട; സി.ജെ. റോയിയുടെ പോസ്റ്റ്മോർട്ടം റിപ്പോർട്ടിലെ ഞെട്ടിക്കുന്ന വിവരങ്ങൾ പുറത്ത്.

ബിസിനസ് ലോകത്തെ ഞെട്ടിച്ചുകൊണ്ട് കോൺഫിഡന്റ് ഗ്രൂപ്പ് ചെയർമാൻ സി.ജെ. റോയിയുടെ അപ്രതീക്ഷിത വിടവാങ്ങൽ. ആദായനികുതി വകുപ്പിന്റെ റെയ്ഡിനിടെ ബെംഗളൂരുവിലെ ഓഫീസിൽ വെച്ച് സ്വയം വെടിയുതിർത്തായിരുന്നു അദ്ദേഹത്തിന്റെ അന്ത്യം. ഈ ദാരുണ സംഭവത്തെക്കുറിച്ചുള്ള കൂടുതൽ വിവരങ്ങൾ ഇപ്പോൾ പുറത്തുവന്നിരിക്കുകയാണ്.

അവസാന നിമിഷം അമ്മയോട് സംസാരിക്കണം എന്ന് മാത്രം പറഞ്ഞു...

മരണത്തിന് തൊട്ടുമുൻപ് അമ്മയോട് സംസാരിക്കണമെന്ന് റോയ് ആഗ്രഹം പ്രകടിപ്പിച്ചിരുന്നു. തന്റെ വിശ്വസ്തനായ എം.ഡി ജോസഫിനോട് അമ്മയെ വിളിക്കാൻ ആവശ്യപ്പെട്ട ശേഷം അദ്ദേഹം ക്യാബിനിൽ തനിച്ചായി. പത്ത് മിനിറ്റിന് ശേഷം ജോസഫ് തിരികെയെത്തിയപ്പോൾ ആരെയും അകത്തേക്ക് വിടരുതെന്ന് റോയ് കർശന നിർദ്ദേശം നൽകി. പിന്നീട് വാതിൽ പൊളിച്ച് അകത്തു കയറിയപ്പോഴാണ് ചോരയിൽ കുളിച്ചു കിടക്കുന്ന റോയിയെ കണ്ടത്.

വലതു കൈ ഉപയോഗിച്ച് ഇടതു നെഞ്ചിലേക്ക് പോയിന്റ് ബ്ലാങ്ക് റേഞ്ചിൽ (ശരീരത്തോട് ചേർത്തുവെച്ച്) വെടിയുതിർക്കുകയായിരുന്നു എന്നാണ് കണ്ടെത്തൽ. 6.35 mm വലിപ്പമുള്ള വെടിയുണ്ട ഹൃദയവും ശ്വാസകോശവും തുളച്ച് പുറത്തുപോയി. ഒറ്റത്തവണ മാത്രമാണ് അദ്ദേഹം വെടിവെച്ചത്.

സി.ജെ. റോയിക്ക് സാമ്പത്തിക ബാധ്യതകളോ ആത്മഹത്യ ചെയ്യേണ്ട മറ്റ് സാഹചര്യങ്ങളോ ഉണ്ടായിരുന്നില്ലെന്ന് അദ്ദേഹത്തിന്റെ സഹോദരൻ സി.ജെ. ബാബു പറയുന്നു. ജനുവരി 28 മുതൽ സ്ഥാപനങ്ങളിൽ നടന്ന ആദായനികുതി വകുപ്പിന്റെ റെയ്ഡും ഉദ്യോഗസ്ഥരിൽ നിന്നുള്ള മാനസിക പീഡനവുമാണ് ഇത്തരമൊരു കടുത്ത തീരുമാനത്തിലേക്ക് അദ്ദേഹത്തെ നയിച്ചതെന്ന് കുടുംബം ആരോപിക്കുന്നു. സംഭവത്തിൽ നിയമനടപടികളുമായി മുന്നോട്ട് പോകാനാണ് കുടുംബത്തിന്റെ തീരുമാനം.

ഒരു വലിയ ബിസിനസ് സാമ്രാജ്യം കെട്ടിപ്പടുത്ത വ്യക്തിയുടെ ഈ അപ്രതീക്ഷിത വിടവാങ്ങൽ പ്രവാസി മലയാളി സമൂഹത്തെയും ബിസിനസ് ലോകത്തെയും ഒരുപോലെ സങ്കടത്തിലാഴ്ത്തിയിരിക്കുകയാണ്.