തിരുവനന്തപുരം: യൂബർ ഓട്ടോയിൽ മറന്നു വെച്ച അധ്യാപികയുടെ മൊബൈൽ ഫോൺ മണിക്കൂറുകൾക്കുള്ളിൽ കണ്ടെത്തി തിരുവനന്തപുരം സിറ്റി സൈബർ സെൽ. ഇന്ന് രാവിലെ സ്കൂളിലേക്ക് പോകുന്നതിനിടെയാണ് പ്രീതി എന്ന അധ്യാപികയ്ക്ക് തന്റെ മൊബൈൽ ഫോൺ യൂബർ ഓട്ടോറിക്ഷയിൽ വെച്ച് നഷ്ടമായത്. ഫോൺ നഷ്ടപ്പെട്ടത് മനസിലായതോടെ വിവരം ഉടൻ തന്നെ തിരുവനന്തപുരം സിറ്റി സൈബർ സെല്ലിൽ പരാതിപ്പെട്ടു. ഇതോടെ സൈബർ സെൽ ഉദ്യോഗസ്ഥരായ ദിനേഷ് കുമാർ, ശ്രീജിത്ത്, ഷിനുരാജ് എന്നിവർ നടത്തിയ അന്വേഷണത്തിൽ ഒരു മണിക്കൂറിനുള്ളിൽ തന്നെ ഫോൺ കണ്ടെത്താൻ സാധിച്ചു. ഡ്രൈവറും ഫോൺ ശ്രദ്ധിച്ചിരുന്നില്ല. ലൊക്കേഷൻ പരിശോധിച്ചപ്പോൾ നഗരത്തിലുണ്ടെന്നത് മനസിലാക്കിയ പൊലീസ് ഡ്രൈവറുമായി ബന്ധപ്പെട്ടാണ് ഫോൺ കണ്ടെത്തിയത്. വിവരം അറിയിച്ച് വീണ്ടെടുത്ത മൊബൈൽ ഫോൺ ഡിസിപി ടി. ഫറാഷ് അധ്യാപികയ്ക്ക് കൈമാറി.
