സമരത്തിനെത്തിയവരില്‍ കൂടുതലും യുവാക്കളാണ്. സമൂഹമാധ്യമങ്ങളിലൂടെയാണ് ഡല്‍ഹിയുടെ വിവിധ മേഖലകളിലുള്ളവര്‍ പ്രതിഷേധത്തിനായി ഒരുമിച്ചുകൂടിയത്. പ്രതിഷേധിക്കണമെങ്കില്‍ സര്‍ക്കാര്‍ അനുവദിച്ചിട്ടുള്ള ജന്ദര്‍മന്ദറില്‍ പോകണമെന്നാണ് പ്രതിഷേധക്കാരോടുള്ള പൊലീസിന്റെ നിലപാട്. പ്രതിഷേധത്തെ തുടര്‍ന്ന് കനത്ത സുരക്ഷയാണ് പൊലീസ് ഉറപ്പുവരുത്തിയത്. ചെറിയ കുട്ടികളും വയോധികരുമടങ്ങുന്ന കുടുംബങ്ങള്‍ എത്തിച്ചേരുന്നതിനാല്‍ വലിയ പൊലീസ് സന്നാഹങ്ങള്‍ ഒരുക്കിയിട്ടുണ്ട്
എങ്കിലും, പൊലീസിന്റെ പ്രതിരോധം മറികടന്നുകൊണ്ട് നിരവധിപേരാണ് ഇന്ത്യാഗേറ്റിന്റെ മുമ്പില്‍ തടിച്ചുകൂടിയിട്ടുള്ളത്. എല്ലാ വര്‍ഷവും ഇത്തരത്തില്‍ വായുമലിനീകരണം ഉണ്ടാകാറുണ്ട്. അപ്പോഴെല്ലാം ആരെയെങ്കിലും പഴിചാരി രക്ഷപ്പെടാനാണ് സര്‍ക്കാര്‍ ശ്രമിക്കാറുള്ളത്. മലിനമായ വായു ശ്വസിച്ചുകൊണ്ട് നിരവധിയാളുകള്‍ മരിച്ചുകൊണ്ടിരിക്കുന്ന സാഹചര്യത്തില്‍ ഇതിനൊരു പരിഹാരം കാണണമെന്നാണ് പ്രതിഷേധക്കാരുടെ ആവശ്യം
