കരുനാഗപ്പള്ളി: വീടിനുസമീപത്തെ വെള്ളക്കെട്ടില്‍ വീണ് നാലുവയസ്സുകാരന്‍ മരിച്ചു. ചവറ നീണ്ടകര താഴത്തുരുത്തില്‍ പഴങ്കാലയില്‍ (സോപാനം) അനീഷ്, ഫിന്‍ല ദിലീപ് ദമ്പതികളുടെ ഏകമകന്‍ അറ്റ്‌ലാന്‍(4) ആണ് മരിച്ചത്. മാതാപിതാക്കള്‍ യു.കെ യിലായതിനാല്‍ അറ്റ്‌ലാന്‍ അമ്മയുടെ കുടുംബ വീട്ടിലായിരുന്നു താമസം. ഇന്നലെ വൈകീട്ട് സ്‌കൂളില്‍ നിന്ന് മുത്തച്ഛന്‍ ദിലീപിനൊപ്പം വീട്ടിലെത്തിയ ശേഷമാണ് സംഭവം നടന്നത്. കുട്ടിയുടെ ബാഗ് അകത്തുവെക്കുന്നതിനിടെ അറ്റ്‌ലാന്‍ വെളിയിലേക്ക് ഓടി. ദിലീപ് തിരിച്ചെത്തുമ്പോള്‍ കുട്ടിയെ കാണാനില്ലായിരുന്നു. തുടര്‍ന്ന് നാട്ടുകാരുടെ നേതൃത്വത്തില്‍ വീടിന് മുന്നിലുള്ള ടി.എസ്. കനാലില്‍ തിരച്ചില്‍ ആരംഭിച്ചു. തിരച്ചിലിനിടെ കുട്ടിയെ വെള്ളത്തില്‍ നിന്ന് കണ്ടെത്തി. ജില്ലാ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. മൃതദേഹം ജില്ലാ ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്
