രാജ്യത്ത് 37 അവശ്യ മരുന്നുകളുടെ വില കുറയ്ക്കാൻ കേന്ദ്ര സർക്കാർ തീരുമാനം. അമോക്‌സിലിൻ, മെറ്റ്ഫോർമിൻ, പാരസെറ്റാമോൾ തുടങ്ങി അവശ്യ മരുന്നുകളുടെ വില കുറയും.നാഷണൽ ഫാർമസ്യൂട്ടിക്കൽ അതോറിറ്റി വില കുറച്ചവയുടെ പട്ടികയിൽ പ്രമേഹം, മാനസിക രോഗം, കാർഡിയോവാസ്‌കുലർ തുടങ്ങിയവക്കുള്ള മരുന്നുകളും ആന്റി- ഇൻഫ്ലമേറ്ററി, ആന്റി ബയോട്ടിക് മരുന്നുകളും അടങ്ങിയിട്ടുണ്ട്. വില കുറച്ചവയിൽ വിട്ടുമാറാത്ത രോഗങ്ങളുടെ ചികിത്സയ്ക്കായി ഉപയോഗിക്കുന്ന ഫിക്സഡ്-ഡോസ് കോമ്പിനേഷനുകളും ഉൾപ്പെടുന്നു. ഇതുസംബന്ധിച്ച വിജ്ഞാപനം ശനിയാഴ്ചയാണ് കേന്ദ്ര സർക്കാർ പുറത്തിറക്കിയത്.അസെക്ലോഫെനാക്, ട്രിപ്‌സിൻ കൈമോട്രിപ്‌സിൻ, പൊട്ടാസ്യം ക്ലാവുലനേറ്റ്, എംപാഗ്ലിഫോസിൻ, സിറ്റാഗ്ലിപ്റ്റിൻ, കുട്ടികൾക്കു നൽകുന്ന തുള്ളി മരുന്നുകൾ, വൈറ്റമിൻ ഡി, കാൽസ്യം ഡ്രോപ്പുകൾ, ഡൈക്ലോഫെനാക് തുടങ്ങിയ മരുന്നുകളുടെ വില ഇതോടെ കുറയും.അവശ്യ മരുന്നുകളുടെ വില നിർണയിക്കുന്നത് മുൻ വർഷത്തെ മൊത്തവില സൂചികയെ അടിസ്ഥാനമാക്കിയാണ്. നിശ്ചയിച്ച വിലകൾ ചരക്ക് സേവന നികുതി (GST) ഒഴികെയുള്ളതാണെന്ന് എൻപിപിഎ വ്യക്തമാക്കി.
ഈ പുതുക്കിയ വിലവിവര പട്ടികകൾ ചില്ലറ വ്യാപാരികളും ഡീലർമാരും വ്യക്തമായി പ്രദർശിപ്പിക്കണമെന്ന് ഉത്തരവിൽ വ്യക്തമാക്കിയിട്ടുണ്ട്. വിജ്ഞാപനം ചെയ്ത വിലയിൽ കൂടുതൽ വാങ്ങിയാൽ പിഴ ചുമത്തുമെന്നും ഉത്തരവിൽ പറയുന്നു.
