തിരുവനന്തപുരം: സമുദ്ര നിരപ്പിൽ നിന്നും ആയിരത്തിൽപരം മീറ്റർ ഉയരത്തിലുള്ള പൊന്മുടിയിലെത്തിയ വിനോദ സഞ്ചാരിക്ക് രാത്രിയിൽ പ്രസവവേദന. വളഞ്ഞും പുളഞ്ഞുമുള്ള റോഡുകളും 22 ഹെയർപിന്നുകളും താണ്ടിയുള്ള ഉദ്വേഗം നിറഞ്ഞ യാത്രകൾക്കൊടുവിൽ പ്രതിസന്ധികളെയെല്ലാം മറികടന്ന് നെടുമങ്ങാട് താലൂക്ക് ആശുപത്രിയിൽ യുവതിക്ക് സുഖപ്രസവം. ഭാര്യയുടെ അവസ്ഥ കണ്ട തളർന്ന ഭർത്താവിനെയും കൂട്ടി കെടിഡിസി ജീവനക്കാർ നടത്തിയ സാഹസിക യാത്രയ്ക്കൊടുവിൽ ജനിച്ച കുഞ്ഞിന് അവർ ചക്രവർത്തിയെന്ന് പേരും നൽകി. ഒടുവിൽ പ്രതിസന്ധി ഘട്ടത്തിൽ കൈത്താങ്ങായി മാറിയ ജീവനക്കാരെ കണ്ട് നന്ദിയറിയിച്ചാണ് ദമ്പതികൾ കുഞ്ഞുമായി മടങ്ങുന്നത്.
