പദ്ധതിയുടെ നിർമാതാക്കളായ ഐഎൽആൻഡ്എഫ്എസുമായി ഏർപ്പെട്ട കരാർപ്രകാരം 15 വർഷത്തെ കാലാവധി 2026-ഓടെ അവസാനിക്കും. കരാർ കാലാവധിക്കുശേഷം സ്റ്റേഡിയവും മറ്റു സംവിധാനങ്ങളും ഭൂമിയുടെ അവകാശികളായ കേരള സർവകലാശാലയ്ക്കു കൈമാറണമെന്നാണ് വ്യവസ്ഥ. ഈ വ്യവസ്ഥയുടെ അടിസ്ഥാനത്തിൽ സ്പോർട്‌സ് ഹബ്ബ് ഏറ്റെടുക്കാൻ സംസ്ഥാനത്തിനു സാധിക്കുമോ എന്നാണ് സമരക്കാർ അന്വേഷിക്കുന്നത്. 2018-ൽ ഐഎൽആൻഡ്എഫ്എസ് സാമ്പത്തിക പ്രതിസന്ധിയിലകപ്പെട്ടതിനെത്തുടർന്ന് കേന്ദ്ര സർക്കാരിന്റെ കമ്പനികാര്യ മന്ത്രാലയത്തിന്റെ നിയന്ത്രണത്തിലാണ് കമ്പനി. ഐഎൽആൻഡ്എഫ്എസിന്റെ ഉപകമ്പനിയായാണ് കാര്യവട്ടം സ്പോർട്‌സ് ഫെസിലിറ്റി ലിമിറ്റഡ് (കെഎസ്എഫ്എൽ) രജിസ്റ്റർ ചെയ്തിട്ടുള്ളത്.
