രാവണൻ സീതാദേവിയെ പുഷ്പകവിമാനത്തിൽ അപഹരിച്ച് ലങ്കയിലേക്ക് കൊണ്ടുപോകുമ്പോൾ, ദേവിയുടെ വിലാപം കേട്ട് രക്ഷയ്ക്കായി പറന്നെത്തിയത് പക്ഷിശ്രേഷ്ഠനായ ജടായുവായിരുന്നു. തുടർന്ന് ആകാശത്തുവെച്ച് രാവണനുമായി നടന്ന ധീരോദാത്തമായ പോരാട്ടത്തിനൊടുവിൽ, രാവണന്റെ 'ചന്ദ്രഹാസം' എന്ന വാളേറ്റ് ചിറകറ്റ ജടായു ഈ കൂറ്റൻ പാറയുടെ മുകളിലേക്ക് പതിച്ചുവെന്നാണ് ഐതിഹ്യം.
സീതാദേവിയെ അന്വേഷിച്ച് ശ്രീരാമനും ലക്ഷ്മണനും എത്തുന്നതുവരെ ജീവൻ നിലനിർത്തിയ ജടായു, നടന്ന സംഭവങ്ങളെല്ലാം ശ്രീരാമനെ ധരിപ്പിച്ച ശേഷമാണ് അന്ത്യശ്വാസം വലിച്ചത്. ജടായു വീണ സ്ഥലം കാലക്രമേണ 'ജടായുമംഗലം' എന്നും, പിന്നീട് അത് ലോപിച്ച് 'ചടയമംഗലം' എന്നും പേര് ലഭിക്കുകയാണുണ്ടായത്.
പാറയുടെ മുകളിലായി ശ്രീരാമന്റെ പാദമുദ്ര പതിഞ്ഞതായി വിശ്വസിക്കപ്പെടുന്ന അടയാളവും, ഒരിക്കലും വറ്റാത്ത ചെറിയ നീരുറവയും ഇപ്പോഴും കാണാൻ കഴിയും. ഐതിഹ്യപ്പെരുമയും അന്താരാഷ്ട്ര നിലവാരത്തിലുള്ള ടൂറിസം സാധ്യതകളും സമന്വയിക്കുന്ന കേന്ദ്രമായി ജടായുപ്പാറ ഇന്ന് ആഗോള ഭൂപടത്തിൽ ഇടംപിടിച്ചിരിക്കുകയാണ്.
