43 കിലോ മയക്കുമരുന്ന് കടത്തിയെന്നതാണ് ഇദ്ദേഹത്തിനെതിരെയുള്ള കുറ്റം. 2023-ലാണ് ഈ കേസിനാസ്പദമായ സംഭവം നടക്കുന്നത്. ഒമാനിൽ നിന്നും റോഡ് മാർഗ്ഗം സൗദിയിലേക്ക് വരുന്നതിനിടെ ഇദ്ദേഹം സഞ്ചരിച്ച ജി.എം.സി വാഹനത്തിൽ നിന്നാണ് വൻ ലഹരിമരുന്ന് ശേഖരം അധികൃതർ പിടിച്ചെടുത്തത്. തുടർന്ന് അറസ്റ്റിലായ ഇദ്ദേഹത്തിന് വിചാരണ കോടതിയാണ് ആദ്യം വധശിക്ഷ വിധിച്ചത്. പിന്നീട് അപ്പീൽ കോടതിയും സുപ്രീം കോടതിയും ഈ ശിക്ഷ ശരിവെക്കുകയായിരുന്നു. വധശിക്ഷ നടപ്പിലാക്കുന്നതിനുള്ള രാജവിജ്ഞാപനം കൂടി പുറത്തിറങ്ങിയതോടെയാണ് ഇന്ന് രാവിലെ ശിക്ഷാ നടപടികൾ പൂർത്തിയാക്കിയത്. സൗദി ആഭ്യന്തര മന്ത്രാലയമാണ് വധശിക്ഷ നടപ്പിലാക്കിയ വിവരം ഔദ്യോഗികമായി പുറത്തുവിട്ടത്.
ഇതുസംബന്ധിച്ച വിവരങ്ങൾ ജയിൽ വകുപ്പിൽ നിന്നും ഇന്ത്യൻ എംബസിക്കും പ്രദേശത്തെ സാമൂഹിക പ്രവർത്തകർക്കും ലഭിച്ചിട്ടുണ്ട്. മയക്കുമരുന്ന് കടത്തിനും വിതരണത്തിനും സൗദി അറേബ്യയിൽ ഏറ്റവും കടുത്ത ശിക്ഷയായ വധശിക്ഷ തന്നെയാണ് നൽകിവരുന്നത്. വൻതോതിൽ ലഹരിമരുന്ന് രാജ്യത്തേക്ക് കടത്താൻ ശ്രമിച്ചതാണ് ഇദ്ദേഹത്തിന് ഈ കടുത്ത ശിക്ഷ ലഭിക്കാൻ കാരണമായത്.
