16 ഇനം നിത്യോപയോഗ സാധനങ്ങൾ ഉൾപ്പെടുന്ന ഓണക്കിറ്റിൽ ഓണസദ്യയ്ക്ക് ആവശ്യമായ പ്രധാന സാധനങ്ങൾ ഉൾപ്പെടുത്തിയിട്ടുണ്ട്. 6,09,305 സൗജന്യ ഓണക്കിറ്റുകളാണ് വിതരണം ചെയ്യുക. ഒരു കിറ്റിന് തുണിസഞ്ചി ഉൾപ്പെടെ ഏകദേശം ₹854 ചെലവ് പ്രതീക്ഷിക്കുന്നതായി മന്ത്രി അറിയിച്ചു. കിറ്റ് വിതരണം ഓഗസ്റ്റ് 25-നകം പൂർത്തിയാക്കും.
ഓണക്കാല ആവശ്യങ്ങൾ കണക്കിലെടുത്ത് 1,65,932 മെട്രിക് ടൺ അരിയും 24,506 മെട്രിക് ടൺ ഗോതമ്പും വിപണിയിലെത്തിക്കും. മുൻഗണനേതര വിഭാഗത്തിനുള്ള സ്പെഷ്യൽ അരി വിതരണം അടുത്ത മാസം ആരംഭിക്കും. നീല കാർഡുകാർക്ക് 3 കിലോ അരി ₹10.90 നിരക്കിലും 2 കിലോ ഗോതമ്പ് ₹8.70 നിരക്കിലും ലഭ്യമാക്കും.
ഓണക്കാല വിപണി ഇടപെടലുകൾ ശക്തിപ്പെടുത്താൻ സപ്ലൈകോയ്ക്ക് ₹253 കോടി അനുവദിച്ചതായും മന്ത്രി അറിയിച്ചു. ഇതിൽ ₹200 കോടി വിപണി ഇടപെടലുകൾക്കായും ₹53 കോടി സൗജന്യ ഓണക്കിറ്റ് വിതരണത്തിനായുമാണ്.
സപ്ലൈകോയുടെ നേതൃത്വത്തിൽ തിരുവനന്തപുരം, എറണാകുളം, കോഴിക്കോട് ജില്ലകളിൽ ഓഗസ്റ്റ് 8 മുതൽ 25 വരെ ഓണം മെഗാ ട്രേഡ് ഫെയറുകൾ നടക്കും. മറ്റ് 11 ജില്ലകളിൽ ഓഗസ്റ്റ് 16 മുതൽ 25 വരെ ജില്ലാ ഓണം ഫെയറുകളും 126 നിയമസഭാ മണ്ഡലങ്ങളിൽ ഓണം മാർക്കറ്റുകളും സംഘടിപ്പിക്കും.
