അർജന്റീനയ്ക്കായി 200-ാം മത്സരം കളിക്കാനിറങ്ങിയ മെസി വല നിറച്ചപ്പോൾ ഈ ലോകകപ്പിലെ ആദ്യ മത്സരത്തിൽ അർജന്റീനയ്ക്ക് വിജയതുടക്കം. അൾജീരിയയെ എതിരില്ലാത്ത മൂന്ന് ഗോളുകൾക്കാണ് അൽബിസെലെസ്റ്റെകൾ തകർത്തത്. ഹാട്രിക് ഗോൾ നേട്ടത്തോടെ ലോകകപ്പ് ഗോൾ വേട്ടക്കാരിൽ ഒന്നാമതെത്താനും മെസ്സിക്ക് സാധിച്ചു.
17-ാം മിനിറ്റിൽ ഡി പോളിന്റെ മനോഹരമായ പാസ്സിൽ നിന്ന് മെസ്സിയുടെ ആദ്യ ഗോൾ പിറന്നത്. മെസ്സിയുടെ കാലിൽ നിന്ന് വെടിയുണ്ട പോലെ പാഞ്ഞ പന്ത് അൾജീരിയൻ ഗോളി ലൂക്ക സിദാന്റെ കൈകളിലുരസി വലയുടെ ടോപ് കോർണറിലേക്ക്. 60-ാം മിനിറ്റിലായിരുന്നു മെസ്സിയുടെ രണ്ടാം ഗോൾ. 76-ാം മിനിറ്റിൽ മൂന്നാം ഗോളോടെ മെസി തന്റെ ലോകകപ്പിലെ ആദ്യ ഹാട്രിക് സ്വന്തമാക്കി. ലോകകപ്പ് ചരിത്രത്തിൽ ഏറ്റവും കൂടുതൽ ഗോൾ എന്ന റെക്കോർഡിൽ ക്ലോസെക്കൊപ്പവും മെസി എത്തി.
ഹാട്രിക് ഗോളിന് പിന്നാലെ 79-ാം മിനിറ്റിൽ മെസിയെ പിൻവലിച്ച് നിക്കോ പാസിനെ അർജന്റീന കളത്തിലിറക്കി.
