എന്തിനാണ് രണ്ട് ചക്രം, ഒന്ന് തന്നെ ധാരാളം; ഒറ്റച്ചക്ര സൈക്കിളിൽ ലോകം ചുറ്റാനിറങ്ങി കണ്ണൂർ സ്വദേശി സനീദ്

ഒറ്റ വീൽ സൈക്കിളിൽ അത്ഭുതങ്ങൾ തീർത്ത് ലോകം ചുറ്റാനിറങ്ങിയിരിക്കുകയാണ് കണ്ണൂർ പരിപ്പായി സ്വദേശി സനീദ് എന്ന ഇരുപത്തിയഞ്ചുകാരൻ. സാഹസികതയോടുള്ള കടുത്ത അഭിനിവേശമാണ് ഈ യുവാവിനെ ഇന്ന് ‘കേരള ടു നേപ്പാൾ’ എന്ന വലിയൊരു ലക്ഷ്യത്തിലേക്ക് എത്തിച്ചിരിക്കുന്നത്.

ആദ്യം ബൈക്ക് സ്റ്റണ്ടുകളോടായിരുന്നു സനീദിന് താല്പര്യം. എന്നാൽ പൊതുനിരത്തുകളിൽ ബൈക്ക് സ്റ്റണ്ട് ചെയ്യുന്നത് നിയമവിരുദ്ധവും മറ്റുള്ളവർക്ക് അപകടകരവുമാണെന്ന് തിരിച്ചറിഞ്ഞതോടെയാണ് സനീദ് സൈക്കിൾ തിരഞ്ഞെടുത്തത്. അതും സാധാരണ സൈക്കിളല്ല, ബാലൻസ് ചെയ്യാൻ ഏറ്റവും ബുദ്ധിമുട്ടുള്ള ഒറ്റ വീൽ സൈക്കിൾ. 2015 മുതലാണ് സനീദ് ഈ വേറിട്ട യാത്ര ആരംഭിക്കുന്നത്.