വെഞ്ഞാറമൂട്: വാമനപുരം നിയോജക മണ്ഡലത്തിലെ മുപ്പതാം നമ്പർ ബൂത്ത് ബി.എൽ.ഒയും മണ്ണന്തല ഗവൺമെന്റ് പ്രസ് ജീവനക്കാരനുമായ അനീഷ് വി.എസ് (37) വാഹനാപകടത്തിൽ മരണപ്പെട്ടു. ബുധനാഴ്ച രാത്രി 10 മണിയോടെ ആലന്തറ മണ്ഡപക്കുന്നിന് സമീപമായിരുന്നു അപകടം.
ആലന്തറ ദീപാനഗർ 'അബനി' വീട്ടിൽ താമസക്കാരനായ അദ്ദേഹം മണ്ണന്തല ഗവൺമെന്റ് പ്രസ്സിൽ ലാസ്കർ ഗ്രേഡ്-1 തസ്തികയിൽ ജോലി ചെയ്തുവരികയായിരുന്നു. അപകടത്തിന് പിന്നാലെ അനീഷിനെ ഉടൻ തന്നെ വെഞ്ഞാറമൂട് ഗോകുലം മെഡിക്കൽ കോളേജിൽ എത്തിച്ചുവെങ്കിലും ജീവൻ രക്ഷിക്കാനായില്ല.
മൃതദേഹം പോസ്റ്റ്മോർട്ടം നടപടികൾക്കായി തിരുവനന്തപുരം മെഡിക്കൽ കോളേജിലേക്ക് മാറ്റി. നെല്ലനാട് ഗ്രാമപഞ്ചായത്ത് ക്ലാർക്ക് പ്രിയ ലക്ഷ്മിയാണ് ഭാര്യ. മക്കൾ: അബനി ലക്ഷ്മി (4 വയസ്), ആദ്രിയൻ (3 വയസ്).
