പുലർച്ചെ ശ്വാസതടസ്സം നേരിട്ടപ്പോൾ ഉറ്റവർ ഓടിക്കയറിയത് ഏക ആശ്രയമായ സർക്കാർ ആശുപത്രിയിലേക്കായിരുന്നു. എന്നാൽ കണ്ടത് അടഞ്ഞുകിടക്കുന്ന ഗേറ്റും തണുത്ത പ്രതികരണങ്ങളുമാണ്. പട്ടി കയറുമെന്ന് പറഞ്ഞ് ഗേറ്റടച്ച അധികൃതർ, ശ്വാസം കിട്ടാതെ പിടയുന്ന മനുഷ്യന്റെ വിങ്ങൽ കണ്ടില്ലെന്ന് നടിച്ചു. "രക്ഷിക്കണേ" എന്ന് ആ യുവാവ് അപേക്ഷിച്ചിട്ടും, ഒന്ന് സി.പി.ആർ നൽകാനോ ഓക്സിജൻ നൽകാനോ ആരും കനിഞ്ഞില്ല.
ഒരു സ്വിഗ്ഗി ജീവനക്കാരനായി കഷ്ടപ്പെട്ട് കുടുംബം പുലർത്തിയിരുന്ന ബിസ്മീറിനെ മെഡിക്കൽ കോളേജിലെത്തിച്ചപ്പോഴേക്കും മരണം സംഭവിച്ചിരുന്നു. ആംബുലൻസിൽ പോലും ജീവൻ നിലനിർത്താനുള്ള സംവിധാനങ്ങളുണ്ടായിരുന്നില്ല എന്ന ബന്ധുക്കളുടെ പരാതി ഗൗരവകരമാണ്.
ആശുപത്രികൾ എന്നത് ജീവൻ രക്ഷിക്കാനുള്ള ഇടമാകണം, അവിടെ മനുഷ്യജീവനേക്കാൾ വില കൽപ്പിക്കേണ്ടത് മറ്റൊന്നിനുമല്ല. ഉത്തരവാദിത്തപ്പെട്ടവർ മറുപടി പറഞ്ഞേ മതിയാകൂ. ഇനിയൊരു കുടുംബത്തിനും ഈ ഗതി വരാതിരിക്കട്ടെ.
