ഇന്ന് നേരം പുലർന്നപ്പോഴേക്കും വിപണയിൽ സ്വർണവും വെള്ളിയും കുതിച്ചു ഉയർന്നിരിക്കുകയാണ്. പെട്ടെന്നുള്ള ആവശ്യകത വർധിച്ചതും ഡോളറിന്റെ ബലഹീനതയും ഭൗമരാഷ്ട്ര അനിശ്ചിതത്വങ്ങളും ഇരു ലോഹങ്ങളുടെയും വിലയെ സ്വാധീനിച്ചിട്ടുണ്ട്. യുഎസ് - വെന്വസേല സംഘർഷം ഇപ്പോഴും ലോക ശ്രദ്ധ നേടുന്നതും ഗ്രീൻലാൻഡ് വിഷയത്തിൽ അമേരിക്കൻ പ്രസിഡന്റ് ഡോണാൾഡ് ട്രംപ് നടത്തിയ പ്രസ്താവനയിൽ നാറ്റോ സഖ്യത്തിന്റെ പ്രതികരണവുമെല്ലാം സ്വർണ - വെള്ളി വിലകളെ സ്വാധീനിക്കുന്നുണ്ട്.
യൂറോപ്യൻ യൂണിയനിലെ ഫ്രാൻസ്, ജർമനി, ഇറ്റലി, പോളണ്ട്, സ്പെയിൻ, യുകെ എന്നീ രാജ്യങ്ങൾ ഗ്രീൻലാൻഡിൽ കണ്ണുവെച്ചുള്ള ട്രംപിന്റെ നീക്കത്തിനെതിരെ രംഗത്തെത്തിയിട്ടുണ്ട്. ഇതുകൂടാതെ ഇറാനിയൻ സംഘർഷവുമായി ബന്ധപ്പെട്ടും ട്രംപ് ചില മുന്നറിയിപ്പുകൾ നൽകിയിട്ടുണ്ട്. പ്രതിഷേധക്കാരുടെ രക്ഷയ്ക്കായി യുഎസ് എത്തുമെന്നാണ് അദ്ദേഹം പറയുന്നത്. ഇതിനും പുറമേ യുഎസ് താരിഫും ഇവ ആഗോള സാമ്പത്തിക വളർച്ചയിൽ സൃഷ്ടിക്കുന്ന സ്വാധീനവും ഉയരുകയാണ്. റഷ്യൻ എണ്ണ വാങ്ങുന്ന രാജ്യങ്ങൾക്ക് അഞ്ഞൂറു ശതമാനം താരിഫ് ചുമത്താനുള്ള ട്രംപിന്റെ തീരുമാനവും വിപണിയെ സ്വാധീനിക്കുന്നുണ്ട്.
