കളിക്കളത്തിൽ ഇതിഹാസങ്ങൾ വെറുതെ കളിക്കുക മാത്രമല്ല, ആരാധകരെ ഇളക്കി മറിക്കുക കൂടിയാണ് ചെയ്യുന്നതെന്ന് തെളിയിക്കുന്നതായിരുന്നു റാഞ്ചിയിലെ കാഴ്ചകൾ. സച്ചിൻ ടെണ്ടുൽക്കറുടെ റെക്കോർഡ് തകർത്ത്, ഒരു ഫോർമാറ്റിൽ ഏറ്റവുമധികം സെഞ്ച്വറികൾ (52) നേടുന്ന താരമായി കോഹ്‌ലി മാറിയ നിമിഷം ഇന്റർനെറ്റ് ലോകം ആഘോഷമാക്കുകയായിരുന്നു.
എം എസ് ധോണിയുടെ ജന്മനാടായ റാഞ്ചിയിൽ വെച്ച് കോഹ്‌ലി ഈ നേട്ടം കൈവരിച്ചത് ആരാധകർക്ക് ഇരട്ടി മധുരമായി. എക്‌സിലും ഇൻസ്റ്റാഗ്രാമിലും ‘King Kohli’, ‘GOAT’ (Greatest of All Time), ‘Record Breaker’ തുടങ്ങിയ ഹാഷ്‌ടാഗുകൾ നിമിഷനേരം കൊണ്ട് ട്രെൻഡിംഗായി.
”വിരാട് കോഹ്‌ലി ഒരു റൺ മെഷീൻ മാത്രമല്ല, ഒരു വികാരമാണ്” എന്നാണ് ഒട്ടുമിക്ക ആരാധകരും സോഷ്യൽ മീഡിയയിൽ കുറിച്ചത്. സച്ചിൻ ടെണ്ടുൽക്കറുടെ പിൻഗാമിയായി എത്തിയ കോഹ്‌ലി, ഇതിഹാസ താരത്തിന്റെ റെക്കോർഡുകൾ ഒന്നൊന്നായി മറികടക്കുമ്പോൾ അത് ക്രിക്കറ്റ് ചരിത്രത്തിലെ തന്നെ അപൂർവ്വ നിമിഷമായി മാറുന്നുവെന്ന് ആരാധകർ ചൂണ്ടിക്കാട്ടുന്നു..
റാഞ്ചിയിലെ ഗാലറിയിൽ മുഴങ്ങിയ ആരവങ്ങൾക്കൊപ്പം, ഡിജിറ്റൽ ലോകത്തും കോഹ്‌ലിക്കുള്ള പിന്തുണ വാനോളമുയർന്നു
