*കഫത്തിന്റെ നിറം ആരോഗ്യത്തെക്കുറിച്ചുള്ള പ്രധാന സൂചനകള്‍ നല്‍കും.*
പൊടി, അലർജി, രോഗാണുക്കള്‍ എന്നിവയെ തടഞ്ഞുനിർത്താനായി ശ്വാസനാളികളും ശ്വാസകോശവുമാണ് കഫം ഉത്പാദിപ്പിക്കുന്നത്. രാവിലെ ചെറിയ അളവില്‍ കഫം വരുന്നത് സാധാരണമാണ്. എന്നാല്‍ അതിന്റെ നിറം മാറുകയോ, കട്ടി കൂടുകയോ ചെയ്താല്‍ ശ്രദ്ധവേണമെന്നും അദ്ദേഹം ഹിന്ദുസ്ഥാൻ ടൈംസിനോട് പറഞ്ഞു.
*വെളുത്ത കഫം*
ചെറിയ അലർജികളെയോ അല്ലെങ്കില്‍ അസ്വസ്ഥതകളെയോ ആണ് വെളുത്ത കഫം സൂചിപ്പിക്കുന്നത്. തെളിഞ്ഞതോ ഇളം വെള്ള നിറത്തിലുള്ളതോ ആയ കഫം സാധാരണ അപകടകരമല്ല. ഇത് ചെറിയ അസ്വസ്ഥതകള്‍, നിർജ്ജലീകരണം, അല്ലെങ്കില്‍ അലർജികള്‍ എന്നിവ മൂലമുണ്ടാകാം. പൊടി, പുക തുടങ്ങിയയവയില്‍ നിന്ന് വിട്ടുനില്‍ക്കുന്നതും ഇതിന്റെ ഉത്പാദനം കുറയ്ക്കാൻ സഹായിക്കും.
*മഞ്ഞ കഫം*
സാധാരണ ജലദോഷം അല്ലെങ്കില്‍ സൈനസൈറ്റിസ് പോലുള്ള ചെറിയ അണുബാധയെ ചെറുക്കാൻ രോഗപ്രതിരോധ സംവിധാനം ശ്രമിക്കുന്നതിന്റെ സൂചനയാണ് മഞ്ഞ കഫം. വെളുത്ത രക്താണുക്കളും ഇൻഫ്ലമേറ്ററി കോശങ്ങളും അണുബാധയുള്ള സ്ഥലത്തേക്ക് എത്തുന്നതാണ് ഈ നിറത്തിന് കാരണം. ഈ പ്രശ്നം ഒരാഴ്ചയില്‍ കൂടുതല്‍ നീണ്ടുനില്‍ക്കുകയോ അല്ലെങ്കില്‍ സ്ഥിതി വഷളാകുകയോ ചെയ്യുകയാണെങ്കില്‍ ഒരു ഡോക്ടറെ കാണുക.
*പച്ച കഫം*
കട്ടിയുള്ള പച്ച കഫം ശ്വാസകോശത്തിലെ ഗുരുതരമായ ബാക്ടീരിയല്‍ അണുബാധയെ സൂചിപ്പിക്കുന്നു. ഇതിനോടൊപ്പം പനി, നെഞ്ചില്‍ മുറുക്കം, അല്ലെങ്കില്‍ വിട്ടുമാറാത്ത ചുമ എന്നിവ ഉണ്ടാകാം. ഈ ആരോഗ്യപ്രശ്നം പരിഹരിക്കുന്നതിന് ഒരുപക്ഷേ ആൻറിബയോട്ടിക്കുകളും ആവശ്യമായി വന്നേക്കാം.
*ബ്രൗണ്‍ കഫം*
പുക, പൊടി, അല്ലെങ്കില്‍ മറ്റ് മലിനീകരണ വസ്തുക്കള്‍ ശ്വസിക്കുന്നതിന്റെ ഫലമായി ബ്രൗണ്‍ കഫം ഉണ്ടാകാം. ശ്വാസനാളങ്ങളിലെ അസ്വസ്ഥത കാരണം ഡ്രൈ ബ്ലഡിനേയും ഇത് സൂചിപ്പിക്കാമെന്നും ഡോക്ടർ പറയുന്നു. പുകവലിക്കുന്ന സ്വഭാവമുണ്ടെങ്കിലോ മലിനമായ അന്തരീക്ഷത്തില്‍ ജോലി ചെയ്യുന്നയാളാണെങ്കിലോ, ശ്വാസകോശത്തിന് ശ്രദ്ധ ആവശ്യമാണെന്നതിന്റെ സൂചനയാണ് ബ്രൗണ്‍ കഫം.
*പിങ്ക് അല്ലെങ്കില്‍ ചുവപ്പ് കഫം*
കഫത്തിലെ പിങ്ക് അല്ലെങ്കില്‍ ചുവന്ന വരകള്‍ ശ്വാസനാളത്തിനുള്ളിലെ രക്തസ്രാവത്തെ സൂചിപ്പിക്കുന്നു. ഇത് അണുബാധ, ദീർഘകാല ശ്വാസകോശ രോഗങ്ങള്‍, അല്ലെങ്കില്‍ ക്ഷയം, ശ്വാസകോശ അർബുദം പോലുള്ള മറ്റ് അവസ്ഥകള്‍ മൂലമാകാം. ഈ സാഹചര്യത്തില്‍ അടിയന്തര വൈദ്യപരിശോധന ആവശ്യമാണ്.
*ശ്രദ്ധിക്കുക : അറിവിനെ ജനകീയമാക്കുക എന്ന ലക്ഷ്യം മാത്രമാണ് ഈ പോസ്റ്റിന് ഉള്ളത്.രോഗനിർണ്ണയത്തിനും ചികിത്സയ്ക്കും പകരമാകാൻ ഉദ്ദേശിച്ചുള്ളതല്ല, കൃതഹസ്തരായ ചികിത്സകരുടെ ഉപദേശപ്രകാരം മാത്രം ഔഷധങ്ങൾ ഉപയോഗിക്കുക.* *കൂടുതൽ പഠനം നടത്തി നല്ലത് മാത്രം സ്വീകരിക്കുക.*
.
