പത്തനംതിട്ട: പ്രണയം ഒരാളെ എങ്ങനെയൊക്കെ മാറ്റുമെന്ന് പറയാൻ പറ്റില്ല. ചിലപ്പോൾ കവിയാക്കും, ചിലപ്പോൾ ചിത്രകാരനാക്കും. എന്നാൽ നമ്മുടെ അനന്തകൃഷ്ണൻ എന്ന 21 വയസ്സുകാരനെ പ്രണയം ഒരു 'വാഹന മോഷ്ടാവാക്കി' മാറ്റി! അതും വെറും പത്ത് ദിവസം കൊണ്ട് നാല് കേസുകളിൽ പ്രതി! "എന്റെ പെണ്ണിനെ പൊന്നുപോലെ നോക്കണം, ഒരുമിച്ച് ജീവിക്കണം" - ഈ ആഗ്രഹം കേട്ട് കണ്ണ് നിറഞ്ഞ പൊലീസ് ഇപ്പോൾ തലയിൽ കൈവെച്ച് ഇരിക്കുകയാണ്.
കഥ തുടങ്ങുന്നത് ഒരു മാസം മുൻപാണ്. അനന്തകൃഷ്ണൻ തന്റെ 18 വയസ്സുകാരി കാമുകിയെ വീട്ടിൽ നിന്ന് വിളിച്ചിറക്കി കൊണ്ടുപോന്നു. വാഴമുട്ടത്തിനടുത്ത് വാടകവീട്ടിൽ ഒരുമിച്ചുള്ള ജീവിതം തുടങ്ങി. നല്ല കാര്യം. പക്ഷേ, ഒരുമിച്ച് ജീവിക്കാൻ പണം വേണ്ടേ? ഇവിടെയാണ് നമ്മുടെ നായകൻ, അല്ല പ്രതി, വഴി തെറ്റി നടക്കാൻ തുടങ്ങിയത്. ചെലവിനുള്ള പണം കണ്ടെത്താൻ അനന്തകൃഷ്ണൻ കണ്ട വഴി ഒരു ശരാശരി മോഷണ ശ്രമമൊന്നുമല്ല, നേരെ വാഹന മോഷണത്തിലേക്ക് തിരിയുകയായിരുന്നു!
പള്ളിയിലെ കണ്ണാടി തകർത്ത് മോഷണത്തിന് ശ്രമം, സിസിടിവിയിൽ ഓട്ടോറിക്ഷ!
കഴിഞ്ഞ 30-ാം തീയതി രാത്രിയാണ് വാഴമുട്ടം സെന്റ് ബെഹ്‍നാൻസ് പള്ളിയിലെ കുരിശടിയുടെ ചില്ലുകൾ തകർത്ത നിലയിൽ കണ്ടെത്തിയത്. മോഷ്ടിക്കാൻ ശ്രമിച്ചതാവണം. പക്ഷേ, അവിടെ ഒന്നും നടന്നില്ല. എങ്കിലും നമ്മുടെ അനന്തകൃഷ്ണൻ അത്രയും കാലം സ്വസ്ഥമായി കിടന്ന കുരിശടിയുടെ ചില്ല് തകർത്തു എന്ന 'കഴിവ്' സിസിടിവിയിൽ നിന്ന് പോലീസിന് ലഭിച്ചു. ദൃശ്യങ്ങളിൽ ഓട്ടോറിക്ഷ കണ്ട പോലീസ് അന്വേഷണം തുടങ്ങി. വള്ളിക്കോടാണ് കഥയുടെ ക്ലൈമാക്സ്. സിസിടിവിയിൽ കണ്ട അതേ ഓട്ടോറിക്ഷ വള്ളിക്കോടൻ പാടത്ത്!
പോലീസ് അനന്തകൃഷ്ണനെ പൊക്കി. ചോദ്യം ചെയ്യലിൽ കുരിശടിയുടെ ചില്ല് തകർത്തത് താനാണെന്ന് സമ്മതിച്ചു. ലക്ഷ്യം മോഷണമായിരുന്നെങ്കിലും നടന്നില്ലെന്ന് സങ്കടത്തോടെ പറഞ്ഞു. (ഒരു പള്ളിയിലെ കണ്ണാടി തകർത്തിട്ടും ഒന്നും കിട്ടാഞ്ഞതിലുള്ള സങ്കടം).
'കാമുകിക്ക് വേണ്ടി' ബൈക്കും ഓട്ടോയും മോഷ്ടിച്ചു, പമ്പിൽ നിന്ന് പെട്രോളടിച്ച് മുങ്ങി!
സംഭവം പള്ളിയിലെ കണ്ണാടി തകർത്തതാണെങ്കിലും, ചോദ്യം ചെയ്യൽ പുരോഗമിച്ചപ്പോൾ അനന്തകൃഷ്ണൻ സാക്ഷാൽ 'വാഹന മോഷണ വീരനാണെന്ന്' തെളിഞ്ഞു! പത്തനംതിട്ടയിൽ നിന്ന് രണ്ട് ബൈക്കുകൾ മോഷ്ടിച്ച കഥ കൂടി പുറത്തുവന്നു. ഉപയോഗിച്ച ഓട്ടോറിക്ഷയാവട്ടെ മലപ്പുറം കുറ്റിപ്പുറത്ത് നിന്ന് മോഷ്ടിച്ചതാണ്.
കഥ ഇവിടെ തീരുന്നില്ല. മോഷണ മുതൽ ഒരു ഭാഗത്ത്, മറുഭാഗത്ത് പെട്രോളടിച്ച് മുങ്ങൽ! 28-ന് രാത്രി കുറ്റിപ്പുറത്ത് നിന്ന് മോഷ്ടിച്ച ഓട്ടോറിക്ഷയുമായി നമ്മുടെ അനന്തകൃഷ്ണൻ നേരെ പെരുമ്പാവൂരിലെ പെട്രോൾ പമ്പിലേക്ക്. 700 രൂപയ്ക്ക് പെട്രോളടിച്ചു, എന്നിട്ട് പണം കൊടുക്കാതെ 'പറപറന്നു'! പമ്പുടമയുടെ പരാതി പ്രകാരം ഓട്ടോറിക്ഷ ഉടമയെ ബന്ധപ്പെട്ടപ്പോഴാണ് മോഷണ വിവരം മനസ്സിലാകുന്നത്. ഭാഗ്യത്തിന് പത്തനംതിട്ട പോലീസ് ഓട്ടോ കണ്ടെത്തിയ വിവരം അറിയിച്ചതോടെ പമ്പുടമയ്ക്കും ഓട്ടോ ഉടമയ്ക്കും ഒരുപോലെ ആശ്വാസമായി.
മുൻപ് വർക്ക്ഷോപ്പിൽ ജോലി ചെയ്തിരുന്ന അനന്തകൃഷ്ണൻ വാഹനങ്ങളുടെ പൂട്ട് പൊളിച്ച്, വയറുകൾ കൂട്ടിയോജിപ്പിച്ച് സ്റ്റാർട്ടാക്കുന്നതിൽ ഒരു 'പ്രത്യേക വൈദഗ്ധ്യം' നേടിയെടുത്തതായും പോലീസ് കണ്ടെത്തിയിട്ടുണ്ട്.
അങ്ങനെ 'പൊന്നുപോലെ നോക്കാൻ' ഇറങ്ങിത്തിരിച്ച അനന്തകൃഷ്ണൻ ഇപ്പോൾ പോലീസിന്റെ കസ്റ്റഡിയിലാണ്. കാമുകിക്ക് വേണ്ടി എന്തും ചെയ്യാം എന്ന് പറയുന്നവരോട്, ദയവായി ഇങ്ങനെ ഒന്നും ചെയ്യരുത് എന്ന് അഭ്യർത്ഥിക്കുന്നു.
