അപകട സാഹചര്യങ്ങളിൽ പെടാതിരിക്കാൻ എല്ലാവരും മുൻകരുതലെടുക്കണം. വേണ്ടിവന്നാൽ മാറി താമസിക്കാനും അധികൃതരുടെ നിർദേശങ്ങൾ പാലിക്കാനും അനാവശ്യ യാത്രകൾ ഒഴിവാക്കാനും ശ്രദ്ധിക്കണമെന്ന് മുഖ്യമന്ത്രി അഭ്യർത്ഥിച്ചത് ഏവരുടെയും ശ്രദ്ധയിലുണ്ടാവണം.
ദേശീയ ദുരന്ത പ്രതികരണ സേനയുടെ ഓരോ ടീമുകൾ തൃശൂർ, പത്തനംതിട്ട, ആലപ്പുഴ, ഇടുക്കി, എറണാകുളം,, മലപ്പുറം ജില്ലകളിൽ എത്തി ചുമതലയേറ്റിട്ടുണ്ട്. പുറമെ അഞ്ചു ടീമിനെക്കൂടി ഇടുക്കി, കോട്ടയം, കൊല്ലം, കണ്ണൂരും, പാലക്കാട് ജില്ലകളിൽ വിന്യസിക്കാനും മുഖ്യമന്ത്രി നിർദ്ദേശം നൽകിയിട്ടുണ്ട്.
ഇന്ത്യൻ ആർമിയുടെ രണ്ടു ടീമുകളും ഡിഫെൻസ് സെക്യൂരിറ്റി കോർപ്സിന്റെ രണ്ടു ടീമുകളും ഇതോടൊപ്പം കർമ്മരംഗത്തുണ്ട്. വ്യോമസേനയും നാവികസേനയും അടിയന്തിര സാഹചര്യം നേരിടാൻ സജ്ജരാണ്.
ഏതു സാഹചര്യമുണ്ടാകുന്നതും മുൻകൂട്ടിക്കണ്ട് ജാഗ്രതയിലാണ് സർക്കാർ. ഭയം വേണ്ടതില്ല; ജാഗ്രത വെടിയുകയുമരുത്.
