ബുധനാഴ്ച ഉച്ചയ്ക്ക് പരശുവയ്ക്കൽ ആടുമൻകാട് ആടുവളർത്തൽ കേന്ദ്രത്തിനു സമീപത്തെ ഇടറോഡിലായിരുന്നു നാടകീയ സംഭവങ്ങൾ. വീട്ടിലേക്കു നടന്നുപോവുകയായിരുന്നു പ്രസന്നകുമാരി. ഈ സമയം സ്കൂട്ടറിലെത്തിയ വിജയദാസ് ഇവരുടെ അടുത്തേക്കെത്തി മാല പൊട്ടിച്ചെടുത്ത് വേഗത്തിൽ സ്കൂട്ടറിൽ കയറി രക്ഷപ്പെടാൻ ശ്രമിക്കുകയായിരുന്നു.
എന്നാൽ ഒട്ടും പതറാതെ പ്രസന്നകുമാരി ഉടൻതന്നെ മോഷ്ടാവിന്‍റെ സ്കൂട്ടർ തോട്ടിലേക്കു തള്ളിയിട്ടു. വാഹനം തോട്ടിൽ വീണതോടെ പരിഭ്രാന്തനായ പ്രതി വാഹനം ഉപേക്ഷിച്ച് ഓടാൻ ശ്രമിച്ചു. ഈ സമയം പ്രസന്നകുമാരിയുടെ നിലവിളി കേട്ടെത്തിയ നാട്ടുകാർ ചേർന്ന് മോഷ്ടാവിനെ വളഞ്ഞുപിടിച്ച് തടഞ്ഞുവയ്ക്കുകയായിരുന്നു. ഉടൻതന്നെ സ്ഥലത്തെത്തിയ പാറശാല പൊലിസ് പ്രതിയെ കസ്റ്റഡിയിലെടുത്തു.
