ഇന്ന് സ്വ‍ർണം വാങ്ങാൻ പ്ലാനുണ്ടോ? വില അറിയാതെ പോയിട്ട് കാര്യമില്ല

സംസ്ഥാനത്തെ സ്വർണവിലയിൽ കഴിഞ്ഞ ദിവസങ്ങളിൽ വലിയ തരത്തിലുള്ള മാറ്റങ്ങളാണ് സംഭവിച്ചുകൊണ്ടിരിക്കുന്നത്. ഇന്ന് സ്വ‌ർണവില മാറ്റമില്ലാതെ തുടരുകയാണ്. ഇന്ന് പവന് 1,09,320 രൂപയും ​ഗ്രാമിന് 13,665 രൂപയുമാണ്. കഴിഞ്ഞ ദിവസം പവന് 1,09,320 രൂപയും ​ഗ്രാമിന് 13,665 രൂപയും എന്ന നിരക്കിലാണ് വ്യാപാരം നടന്നത്. ഈ മാസത്തെ ഏറ്റവും ഉയർന്ന സ്വ‍‌‌‍‍ർണനിരക്ക് രേഖപ്പെടുത്തിയത് ജൂൺ 11നായിരുന്നു. അന്ന് പവന് 1,06,800 രൂപയായിരുന്നു. ജൂൺ ഒന്ന്, രണ്ട്, മൂന്ന് ദിവസങ്ങളിലാണ് ഈ മാസത്തെ ഏറ്റവും ഉയർന്ന സ്വർണനിരക്ക് രേഖപ്പെടുത്തിയിരുന്നത്. അന്ന് പവന് 1,14,560 രൂപയും ​ഗ്രാമിന് 14,320 രൂപയുമായിരുന്നു.

ഇറാനുമായുള്ള യുദ്ധം അവസാനിച്ചെന്നും സമാധാന കരാറിന് അരികിലാണെന്നുമുള്ള അമേരിക്കൻ പ്രസിഡന്റ് ഡൊണാൾഡ് ട്രംപിന്റെ വാക്കുകളാണ് സ്വർണവിലയിൽ പ്രതിഫലിക്കുന്നതെന്നാണ് റിപ്പോ‍‍ർട്ടുകൾ. അമേരിക്കയിൽ പലിശനിരക്ക് കൂട്ടിയാൽ സ്വാഭാവികമായി സ്വർണവില കുറയുമെന്നാണ് സാമ്പത്തിക വിദ​ഗ്ദർ വ്യക്തമാക്കുന്നത്. ജനുവരി 29ന് രേഖപ്പെടുത്തിയ 1,31,160 രൂപയാണ് സ്വർണവിലയിലെ ഇതുവരെ രേഖപ്പെടുത്തിയ റെക്കോർഡ് വില. ഡിസംബർ 23നാണ് പവൻ വില ആദ്യമായി ഒരു ലക്ഷം കടന്നത്.

അതേസമയം, ഇന്ന് വെള്ളിവിലയിലും മാറ്റമൊന്നും രേഖപ്പെടുത്തിയിട്ടില്ല. ​ഗ്രാമിന് 270 രൂപയും കിലോ​ഗ്രാമിന് 2,70,000 രൂപയുമാണ്.അന്താരാഷ്ട്ര വിപണിക്കനുസരിച്ചാണ് കേരളത്തിലെ വെള്ളിവില നിശ്ചയിക്കപ്പെടുന്നത്. ഡോളറുമായി താരതമ്യം ചെയ്യുമ്പോൾ രൂപയുടെ വിലയിൽ വരുന്ന കയറ്റിറക്കങ്ങളും വെള്ളിവിലയെ സ്വാധീനിക്കും.