ബാലുശ്ശേരി പഞ്ചായത്തിലെ പുത്തൂർവട്ടം പ്രദേശത്ത് കവുങ്ങിൻ തോട്ടത്തിൽ താമസിക്കുന്ന ജാനുവും മകൾ പ്രമീളയും കടുത്ത സാമ്പത്തിക പ്രതിസന്ധി നേരിട്ടതിനെ തുടർന്ന് തങ്ങളുടെ കിടപ്പാടം പണയംവെച്ച് 75,000 രൂപ വായ്പയെടുത്തിരുന്നു. എന്നാൽ ജീവിത സാഹചര്യങ്ങളും സാമ്പത്തിക ബുദ്ധിമുട്ടുകളും കാരണം വായ്പയുടെ തിരിച്ചടവ് മുടങ്ങി. തുടർന്ന് ബാങ്ക് നിയമനടപടികളിലേക്ക് കടക്കുകയും, ഒടുവിൽ സ്ഥലം ലേലം ചെയ്യാനുള്ള നടപടികൾ ആരംഭിക്കുകയും ചെയ്തു.
ഈ ഘട്ടത്തിലാണ് റിക്കവറി ഓഫീസറെന്ന നിലയിൽ മേഴ്സി ചെറിയാൻ ആ കുടുംബവുമായി അടുത്തറിയുന്നത്. സ്ഥലത്തിന്റെ അളവെടുപ്പിനും തുടർ നടപടികൾക്കുമായി സ്പെഷ്യൽ സെയിൽ ഓഫീസറോടൊപ്പം എത്തിയ മേഴ്സിക്ക് കുടുംബത്തിന്റെ ദയനീയ അവസ്ഥ നേരിൽ ബോധ്യമായി. നിയമനടപടികളുടെ ഭാഗമായെത്തിയ ഉദ്യോഗസ്ഥയ്ക്ക് മുന്നിൽ അന്ന് തുറന്നുകാട്ടപ്പെട്ടത് കടബാധ്യതകളിൽ മുങ്ങിപ്പോയ ഒരു കുടുംബത്തിന്റെ ജീവിത പോരാട്ടമായിരുന്നു.
ആ കാഴ്ച മേഴ്സിയെ ആഴത്തിൽ സ്പർശിച്ചു. തുടർന്ന് ആ കുടുംബത്തിന്റെ വായ്പാ ബാധ്യത ഏറ്റെടുക്കാൻ അവർ തീരുമാനിക്കുകയായിരുന്നു. 2022-ൽ ഏകദേശം 80,000 രൂപയ്ക്ക് വായ്പ പുതുക്കി ക്രമീകരിച്ച ശേഷം, കഴിഞ്ഞ നാല് വർഷമായി ഓരോ മാസവും 1,500 രൂപ വീതം സ്വന്തം കൈയിൽ നിന്നാണ് അവർ തിരിച്ചടച്ചത്.
സർവീസിൽ നിന്ന് വിരമിക്കാനിരിക്കെ ഈ തിരിച്ചടവ് മുടങ്ങാൻ സാധ്യതയുണ്ടെന്ന് മനസിലാക്കിയ മേഴ്സി, വായ്പയിൽ അവശേഷിച്ചിരുന്ന 41,000 രൂപ ഒരുമിച്ച് അടച്ചുതീർക്കുകയും കുടുംബത്തിന്റെ വീടിന്റെ ആധാരം തിരികെ വാങ്ങി കൈമാറുകയും ചെയ്തു. നിയമത്തിന്റെ ഭാഗമായി ആരംഭിച്ച ഒരു യാത്ര ഒടുവിൽ മനുഷ്യസ്നേഹത്തിന്റെ വിജയഗാഥയായി മാറുകയായിരുന്നു.
വിരമിക്കുന്ന അവസാന ദിവസം മേഴ്സി ചെറിയാനെ യാത്രയാക്കാൻ ജാനുവും മകൾ പ്രമീളയും ബാങ്കിലെത്തി. നന്ദിയും സന്തോഷവും കണ്ണീരുമായി അവർ മേഴ്സിക്ക് മുന്നിൽ നിന്നപ്പോൾ അവിടെയുണ്ടായിരുന്നവർക്ക് അത് വികാരനിർഭരമായ നിമിഷമായി. ഒരു ഉദ്യോഗസ്ഥ എന്ന നിലയിൽ മാത്രമല്ല, മനുഷ്യസ്നേഹത്തിന്റെ പ്രതിരൂപമായും മേഴ്സി ചെറിയാൻ എല്ലാവരുടെയും ഹൃദയത്തിൽ ഇടം നേടി.
