മത്സരത്തിൻ്റെ ഏഴാം മിനുട്ടിൽ എലിജ ജസ്റ്റിലൂടെ ന്യൂസിലാൻഡ് മുന്നിലെത്തിയെങ്കിലും 32-ാം മിനുട്ടിൽ പ്രതിരോധ താരം റാമിൻ റെസയീനിലൂടെ ഇറാൻ മറുപടി ഗോൾ നേടി. ഈ ഗോൾ പിറന്നതോടെയാണ് ഗാലറിയിലുണ്ടായിരുന്ന ഇറാൻ ആരാധകർ ഒരേമനസ്സോടെ ‘മിനാബ് 168’ എന്നെഴുതിയ കാർഡുകൾ ഒന്നിച്ച് വായുവിൽ ഉയർത്തിയത്. യു.എസ് നടത്തിയ കൂട്ടക്കുരുതിയെ ലോകവേദിയിൽ വെച്ച് അപലപിക്കുകയായിരുന്നു അവർ. മത്സരത്തിൽ മുഹമ്മദ് മൊഹെബിയും ഇറാനായി വലകുലുക്കിയിരുന്നു.
ലോകകപ്പ് പോരാട്ടങ്ങൾക്കായി ലൊസാഞ്ചൽസിൽ വിമാനമിറങ്ങിയപ്പോൾ തന്നെ ഇറാൻ താരങ്ങളുടെ നെഞ്ചിൽ ‘168’ എന്നെഴുതിയ ബാഡ്ജുകൾ ഉണ്ടായിരുന്നു. കഴിഞ്ഞ ഫെബ്രുവരി 28-നാണ് ഇറാന്റെ ചരിത്രത്തിലെ ആ കറുത്ത ദിനം സംഭവിച്ചത്. ഇറാനിലെ മിനാബ് നഗരത്തിലുള്ള ഒരു സ്കൂളിന് നേരെ യു.എസ് നടത്തിയ ആക്രമണത്തിൽ 168 പിഞ്ചുകുഞ്ഞുങ്ങളാണ് കൊല്ലപ്പെട്ടത്. ആഗോളതലത്തിൽ വലിയ പ്രതിഷേധത്തിന് കാരണമായ ഈ ആക്രമണം യു.എസ് സൈന്യത്തിന്റെ ടോമഹോക് മിസൈലുകൾ ഉപയോഗിച്ചാണ് നടത്തിയതെന്ന് ഇറാൻ വ്യക്തമാക്കിയെങ്കിലും അമേരിക്ക ഇത് ഇതുവരെ അംഗീകരിച്ചിട്ടില്ല. ഈ രാഷ്ട്രീയ സംഘർഷങ്ങളുടെയും കനത്ത വേദനകളുടെയും പശ്ചാത്തലത്തിലാണ് ഗോൾ ആഘോഷ വേളയിലും തങ്ങളുടെ കുഞ്ഞുങ്ങൾക്ക് വേണ്ടിയുള്ള നീതിക്കായി ഇറാൻ ആരാധകർ ലോകവേദിയിൽ ശബ്ദമുയർത്തിയത്.
