നിലമേൽ: നിലമേൽ പുതുശ്ശേരിയിൽ ഉണ്ടായ ദാരുണമായ വാഹനാപകടത്തിൽ അമ്മയും മകളും മരണപ്പെട്ടു. പന്തളം മങ്ങാരം സെലിൻ നിവാസിൽ സെൽവ മുഹമ്മദ്, മകൾ ഹാൽവി ജലാൽ എന്നിവരാണ് മരിച്ചത്. ചൊവ്വാഴ്ച രാത്രിയായിരുന്നു അപകടം.
റോഡ് വശത്ത് നിർത്തിയിട്ടിരുന്ന ഇവരുടെ സ്കൂട്ടറിന് പിന്നിൽ അതേ ദിശയിൽ നിന്നെത്തിയ കാർ ഇടിക്കുകയായിരുന്നു. ഇടിയുടെ ആഘാതത്തിൽ തെറിച്ചു വീണ ഇരുവർക്കും ഗുരുതരമായി പരിക്കേറ്റു. അപകടമുണ്ടാക്കിയ കാർ നിർത്താതെ പോയതായി ദൃക്സാക്ഷികൾ പറഞ്ഞു.
ഉടൻ തന്നെ ഇവരെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. നിർത്താതെ പോയ കാറിനായി പോലീസ് അന്വേഷണം ആരംഭിച്ചിട്ടുണ്ട്. പ്രദേശത്തെ സിസിടിവി ദൃശ്യങ്ങൾ കേന്ദ്രീകരിച്ചാണ് നിലവിൽ അന്വേഷണം പുരോഗമിക്കുന്നത്. പന്തളം സ്വദേശികളായ ഇരുവരുടെയും വിയോഗം നാടിനെ ദുഃഖത്തിലാഴ്ത്തി.
