കഴിഞ്ഞ ദിവസമാണ് പത്തംഗ സംഘത്തോടൊപ്പം ശരണ്യ ട്രക്കിംഗിനായി കുടകിലെത്തിയത്. നടത്തത്തിനിടയിൽ സംഘത്തിൽ നിന്നും അല്പം പിന്നിലായിപ്പോയ ശരണ്യക്ക് വഴി തെറ്റുകയായിരുന്നു. മൊബൈൽ റേഞ്ചും വെളിച്ചവും ഇല്ലാത്ത കാടിനുള്ളിൽ നാല് ദിവസമാണ് ഈ യുവതി കഴിച്ചുകൂട്ടിയത്.
കർണാടക പൊലീസും വനംവകുപ്പും നാട്ടുകാരും ചേർന്നുള്ള ഊർജ്ജിതമായ തിരച്ചിലിനൊടുവിൽ വനത്തിനുള്ളിലെ ഒരു ചാലിൽ നിന്നാണ് ശരണ്യയെ കണ്ടെത്തിയത്. അത്യാധുനിക സംവിധാനമായ തെർമൽ ഡ്രോണുകളുടെ സഹായം തിരച്ചിലിൽ നിർണ്ണായകമായി. കാടിനുള്ളിലെ മനുഷ്യസാന്നിധ്യം ഡ്രോൺ തിരിച്ചറിഞ്ഞതോടെ രക്ഷാപ്രവർത്തകർ അവിടേക്ക് കുതിക്കുകയായിരുന്നു.
നിലവിൽ ശരണ്യ സുരക്ഷിതയാണ്. നാല് ദിവസം കാട്ടിൽ ഒറ്റപ്പെട്ടതിന്റെ ചെറിയ ശാരീരിക അവശതകൾ ഉണ്ടെങ്കിലും ആരോഗ്യനില തൃപ്തികരമാണെന്ന് അധികൃതർ അറിയിച്ചു. ശരണ്യയെ കാടിന് പുറത്തെത്തിച്ച് പ്രാഥമിക ചികിത്സകൾക്ക് ശേഷം ബന്ധുക്കൾക്കൊപ്പം വിട്ടു.
അപകടം പതിയിരിക്കുന്ന വനത്തിനുള്ളിൽ ഭയപ്പെടാതെ പിടിച്ചുനിന്ന ശരണ്യയുടെ കരുത്തിന് കൈയ്യടിക്കുകയാണ് സോഷ്യൽ മീഡിയ. പ്രാർത്ഥിച്ചവർക്കും തിരച്ചിലിൽ പങ്കെടുത്തവർക്കും നന്ദി.
