ഷൂട്ടിംഗ് ആവശ്യങ്ങൾക്കായി ചെന്നൈയിലെത്തിയ സുഭാഷിണി, ഞായറാഴ്ച രാത്രി ബെംഗളൂരുവിലുള്ള ഭർത്താവ് ബിപിൻ ചന്ദ്രനുമായി വീഡിയോ കോളിൽ സംസാരിച്ചിരുന്നു. ഈ സംഭാഷണത്തിനിടെ കുടുംബപരമായ വിഷയങ്ങളെച്ചൊല്ലി ഇരുവരും തമ്മിൽ കടുത്ത വാഗ്വാദം നടന്നു. തർക്കം രൂക്ഷമായതോടെ, വീഡിയോ കോൾ കട്ട് ചെയ്യാതെ തന്നെ താരം ജീവനൊടുക്കാൻ ശ്രമിക്കുകയായിരുന്നു എന്നാണ് പ്രാഥമിക നിഗമനം.
ഭാര്യയുടെ ഭാഗത്തുനിന്ന് പ്രതികരണമില്ലാതായതോടെ പരിഭ്രാന്തനായ ബിപിൻ ഉടൻ തന്നെ പോലീസിനെയും സുഹൃത്തുക്കളെയും വിവരമറിയിച്ചു. പോലീസ് എത്തി വാതിൽ പൊളിച്ച് അകത്തുകടന്നപ്പോഴേക്കും വിധി സുഭാഷിണിയെ കൊണ്ടുപോയിരുന്നു. നീണ്ടനാളത്തെ പ്രണയത്തിനൊടുവിൽ 2024 ഏപ്രിലിലായിരുന്നു ഇവരുടെ വിവാഹം. ഏറെ പ്രതീക്ഷകളോടെ തുടങ്ങിയ ജീവിതം വെറും രണ്ട് വർഷത്തിനുള്ളിൽ ഇത്തരമൊരു ദുരന്തത്തിൽ അവസാനിച്ചത് വിശ്വസിക്കാനാകാതെ തളർന്നിരിക്കുകയാണ് സുഹൃത്തുക്കളും സഹപ്രവർത്തകരും.
