മൈതാനത്ത് പന്തുതട്ടി നടക്കേണ്ട പ്രായത്തിൽ, ഒരുപിടി സ്വപ്നങ്ങൾ ബാക്കിവെച്ച് വിശ്വജിത്ത് യാത്രയായി. കൊഴിഞ്ഞാമ്പാറ സെന്റ് പോൾസ് സ്കൂളിലെ ഏഴാം ക്ലാസ് വിദ്യാർത്ഥിയായ വിശ്വജിത്തിനെ (13) വീടിനുള്ളിലെ ശുചിമുറിയിൽ തൂങ്ങിമരിച്ച നിലയിലാണ് കണ്ടെത്തിയത്.
ഇന്നലെ രാവിലെ കുളിക്കാനായി കയറിയ മകൻ ഏറെ നേരം കഴിഞ്ഞിട്ടും പുറത്തുവരാത്തതിനെ തുടർന്ന് മാതാപിതാക്കൾ വാതിൽ പൊളിച്ചു നോക്കിയപ്പോഴാണ് നാടിനെ നടുക്കിയ ആ കാഴ്ച കണ്ടത്. ഫുട്ബോൾ അക്കാദമിയിൽ പരിശീലനത്തിന് പോകണമെന്ന വിശ്വജിത്തിന്റെ ആഗ്രഹം 'പിന്നീടാകാം' എന്ന് രക്ഷിതാക്കൾ പറഞ്ഞതിലെ വിഷമമാണ് ഈ കടുംകൈക്ക് പ്രേരിപ്പിച്ചതെന്നാണ് പ്രാഥമിക നിഗമനം.
എലക്കോട് പോന്തക്കോടുള്ള ശിവപ്രസാദ്-സജിത ദമ്പതികളുടെ മകനാണ് വിശ്വജിത്ത്. ഒരു നിമിഷത്തെ സങ്കടത്തിൽ പൊലിഞ്ഞുപോയത് ഒരു നാടിന്റെയും കുടുംബത്തിന്റെയും പ്രതീക്ഷകളാണ്.
"പ്രിയപ്പെട്ട കൂട്ടുകാരേ, ജീവിതത്തിൽ സങ്കടങ്ങളും, ആഗ്രഹിച്ച കാര്യങ്ങൾ നടക്കാത്ത സാഹചര്യങ്ങളും ഉണ്ടായേക്കാം. എന്നാൽ അത്തരം നിമിഷങ്ങളിൽ തളർന്നുപോകാതെ മാതാപിതാക്കളോടോ അധ്യാപകരോടോ മനസ്സ് തുറന്ന് സംസാരിക്കുക; മനോഹരമായ ഈ ജീവിതം പോരാടി ജയിക്കാനുള്ളതാണ്.." Media16 news
