സി.ജെ റോയിയുടെ കാര്യത്തിലും സംഭവിച്ചത് സമാനമായ ഒന്നാണോ എന്ന് തോന്നിപ്പോകുന്നു. നിക്ഷേപകർക്ക് നൽകിയ വാഗ്ദാനങ്ങൾ പാലിക്കാനാവാതെ വരുമ്പോൾ, ആഡംബര ജീവിതത്തിന്റെ നിറപ്പകിട്ടുകൾക്കിടയിൽ അദ്ദേഹം അനുഭവിച്ച മാനസിക സമ്മർദ്ദം എത്രത്തോളമായിരുന്നിരിക്കും? ഒരു പ്രോജക്റ്റിലെ ഫണ്ട് മറ്റൊന്നിലേക്ക് വകമാറ്റുന്ന 'ഫണ്ട് ഡൈവേഴ്ഷനും' കൃത്യമായ പ്ലാനിംഗിന്റെ കുറവും പല വലിയ സാമ്രാജ്യങ്ങളെയും തകർത്തിട്ടുണ്ട്.
മറ്റുള്ളവരുടെ മുന്നിൽ വലിയവനായി ജീവിക്കാൻ ശ്രമിക്കുമ്പോൾ, ഉള്ളിലെ വേവലാതികൾ ആരും കാണാറില്ല. ആഡംബര ജീവിതം എന്നത് വെറുമൊരു ശൈലി മാത്രമല്ല, മറിച്ച് പലപ്പോഴും ബിസിനസ്സ് ലോകത്ത് വിശ്വസ്തത നേടിയെടുക്കാനുള്ള ഒരു മുഖംമൂടി കൂടിയാണ്. 'കാശുണ്ട്' എന്ന് കാണിച്ചാൽ മാത്രമേ ഇൻവെസ്റ്റേഴ്സിന് ആത്മവിശ്വാസം ലഭിക്കൂ എന്ന സാഹചര്യം ഒരു വ്യക്തിയെ എത്രത്തോളം സമ്മർദ്ദത്തിലാക്കുമെന്ന് ഈ സംഭവങ്ങൾ ഓർമ്മിപ്പിക്കുന്നു.
സി.ജെ റോയിക്ക് ആരെയും ചതിക്കണമെന്ന ഉദ്ദേശമില്ലായിരുന്നു എന്നത് തന്റെ ഡയറിയിൽ പണം തിരികെ നൽകേണ്ടവരുടെ ലിസ്റ്റ് കൃത്യമായി എഴുതിവെച്ചതിൽ നിന്നും വ്യക്തമാണ്. തോറ്റുപോയത് ബിസിനസ്സിലും ജീവിതത്തിലുമാകാം, പക്ഷേ ഒരു മനുഷ്യനെന്ന നിലയിൽ തന്റെ ബാധ്യതകൾ തീർക്കാൻ അദ്ദേഹം ആഗ്രഹിച്ചിരുന്നു. ദുരഭിമാനവും ആഡംബരവും ചേർന്ന് ശ്വാസം മുട്ടിക്കുമ്പോൾ, ലോകത്തിന് മുന്നിൽ തോൽക്കുന്നതിനേക്കാൾ നല്ലത് മരണമാണെന്ന് ആ മനസ്സ് ചിന്തിച്ചുപോയതാവാം.
മികച്ച ഒരു മാനേജ്മെന്റ് സംവിധാനം കൂടെയുണ്ടായിരുന്നെങ്കിൽ ചരിത്രം മറ്റൊന്നാകുമായിരുന്നു. ഇത് റോയിയുടെ മാത്രം കഥയല്ല, ആഡംബരത്തിന്റെ പുറംമോടിയിൽ വിജയങ്ങൾ തുന്നാൻ ശ്രമിക്കുന്ന ഓരോ ബിസിനസ്സുകാരനും മുന്നിലുള്ളൊരു വലിയ മുന്നറിയിപ്പാണ്. വിധിയുടെ വിളയാട്ടം എന്നല്ലാതെ മറ്റെന്ത് പറയാൻ!
