ശ്രീനാരായണ ഗുരുദേവന്റെ അനുഗ്രഹത്തോടെ ആരംഭിച്ച ശിവഗിരി തീർത്ഥാടനം, വിദ്യാഭ്യാസം, ശുചിത്വം, ഈശ്വരഭക്തി, സംഘടന, കൃഷി, കച്ചവടം, കൈത്തൊഴിൽ, ശാസ്ത്ര–സാങ്കേതികവിദ്യ എന്നീ എട്ട് മഹത്തായ ലക്ഷ്യങ്ങളെ ( അഷ്ടലക്ഷ്യങ്ങൾ ) ആധാരമാക്കി സമൂഹത്തിന്റെ ആത്മീയ–സാമൂഹിക ഉന്നമനത്തിനായി നിലനില്ക്കുന്നു. ഈ അഷ്ടലക്ഷ്യങ്ങളെ ജീവിതത്തിലും സമൂഹത്തിലും പ്രാവർത്തികമാക്കുന്ന വ്യക്തികളെയും സ്ഥാപനങ്ങളെയും ആദരിക്കുന്നതിനായി, ശ്രീനാരായണ ധർമ്മസംഘം ട്രസ്റ്റ് (SNDST) ഈ വർഷം മുതൽ “ശിവഗിരി തീർത്ഥാടന പുരസ്കാരം” എന്ന പേരിൽ വാർഷിക പുരസ്കാരം ഏർപ്പെടുത്തിയിരിക്കുകയാണ്.
Sree Narayana Institute of Medical Sciences (SNIMS), കൊച്ചി, ഗുരുദേവന്റെ മാനവിക ദർശനത്തിൽ ആധാരിതമായി വിദ്യാഭ്യാസത്തെയും സേവനത്തെയും ഏകീകരിക്കുന്ന ഒരു മാതൃകാ മെഡിക്കൽ സ്ഥാപനമായി നിലകൊള്ളുന്നു. എം ബി ബി എസ്, പി.ജി. മെഡിക്കൽ പഠനങ്ങൾ, നഴ്സിംഗ് വിദ്യാഭ്യാസം, ആശുപത്രി എന്നിവയിലൂടെ ഗുണമേന്മയുള്ള ചികിത്സയും കരുണാപൂർണ സേവനവും സമൂഹത്തിലേക്ക് എത്തിക്കുന്നതിൽ (SNIMS) നിർണായക പങ്ക് വഹിക്കുന്നു. അക്കാദമിക് മികവിനൊപ്പം സാമൂഹിക പ്രതിബദ്ധതയും മാനവിക മൂല്യങ്ങളും ഉയർത്തിപ്പിടിക്കുന്ന ഈ സ്ഥാപനത്തിന്റെ സംഭാവനകൾ പൊതുജനാരോഗ്യത്തിനും സാമൂഹിക പുരോഗതിക്കും ശക്തമായ പ്രചോദനമായി മാറുന്നുവെന്നു ജൂറി സാക്ഷ്യപ്പെടുത്തി.
ശിവഗിരി തീർത്ഥാടനത്തിന്റെ പ്രഥമ വിഷയമായ “വിദ്യാഭ്യാസം” എന്ന ആശയത്തെ മുൻനിർത്തിയാണ് 2025 വർഷത്തേക്കുള്ള ആദ്യ ശിവഗിരി തീർത്ഥാടന പുരസ്കാരം നൽകിയത്
ഗുരുദേവന്റെ “ വിദ്യകൊണ്ട് സ്വതന്ത്രരാകുക " എന്ന ദർശനത്തെ ആധുനിക കാലഘട്ടത്തിൽ അതുല്യമായി പ്രാവർത്തികമാക്കുന്ന സ്ഥാപനത്തെയോ വ്യക്തിയേയോ ആദരിക്കുകയാണ് ഈ പുരസ്കാരത്തിന്റെ ലക്ഷ്യം.
പുരസ്കാര നിർണ്ണയത്തിനായി രൂപീകരിച്ച ജൂറിയിൽ മുൻ കേരള ചീഫ് സെക്രട്ടറിയും പ്രശസ്ത സിവിൽ സർവന്റും അക്കാദമീഷ്യനുമായ ഡോ. കെ. ജയകുമാർ, അധ്യക്ഷനും കേരള അഡീഷണൽ ഡയറക്ടർ ജനറൽ ഓഫ് പോലീസ് ശ്രീ പി. വിജയൻ IPS, ശ്രീനാരായണ ഗുരു ഓപ്പൺ യൂണിവേഴ്സിറ്റി വൈസ് ചാൻസലർ ഡോ. ജഗതിരാജ് എന്നിവർ അംഗങ്ങളുമാണ്.
₹ 1,00,001/- (ഒരു ലക്ഷത്തി ഒരു രൂപ)യും, സ്മാരക ഫലകവും പ്രശസ്തിപത്രവും അടങ്ങുതാണ് പുരസ്കാരം. പ്രസ്തുത പുരസ്കാരം 93-ാമത് ശിവഗിരി തീർത്ഥാടനത്തിന്റെ ഉദ്ഘാടന സമ്മേളനത്തിൽ,
2025 ഡിസംബർ 31-ന്, ബഹു: കേരള മുഖ്യമന്ത്രി ശ്രീ. പിണറായി വിജയൻ സമ്മാനിക്കുന്നതാതാണെന്ന് ശിവഗിരി മഠം പ്രസിഡന്റ് ബ്രഹ്മശ്രീ സച്ചിദാനന്ദ സ്വാമികൾ അറിയിച്ചു
വരും വർഷങ്ങളിൽ, ശിവഗിരി തീർത്ഥാടനത്തിന്റെ മറ്റ് അഷ്ടലക്ഷ്യങ്ങളായ ശുചിത്വം, ഈശ്വരഭക്തി, സംഘടന, കൃഷി, കച്ചവടം, കൈത്തൊഴിൽ, ശാസ്ത്ര–സാങ്കേതികവിദ്യ തുടങ്ങിയ മേഖലകളിൽ ഗുരുദേവന്റെ സന്ദേശങ്ങൾ സമൂഹത്തിൽ ശക്തമായി പ്രചരിപ്പിക്കുന്ന വ്യക്തികളെയും സ്ഥാപനങ്ങളെയും പുരസ്കാരങ്ങളിലൂടെ ആദരിക്കുന്നതായിരിക്കുമെന്നും തീർത്ഥാടന കമ്മറ്റി അറിയിച്ചു.
