വീടിനുള്ളിലെ വായു ശുദ്ധമാക്കുന്നത് ഹൃദ്രോഗികൾക്ക് സഹായകരമാകുമോ? പ്രത്യേകപഠനം ആരംഭിച്ച് ശ്രീചിത്ര ഇൻസ്റ്റിറ്റ്യൂട്ട്

ഹൃദയ പരിക്ഷീണതയും, മറ്റു ഹൃദയ സംബന്ധമായ രോഗങ്ങളും രൂക്ഷമാകുന്നതിന് വായു മലിനീകരണം ഒരു പ്രധാന കാരണമാണ്. വീടിനുള്ളിലെ വായു ശുദ്ധമാക്കുന്നത് മൂലം ഹൃദയ പരിക്ഷീണത രോഗികളുടെ ആരോഗ്യത്തിൽ എന്തെങ്കിലും കാര്യമായ മെച്ചപ്പെടുത്തലുകൾ വരുത്തുവാൻ സഹായകരമാകുമോ എന്ന് കണ്ടെത്താൻ തിരുവനന്തപുരത്തെ ശ്രീ ചിത്ര തിരുന്നാൾ ഇൻസ്റ്റിറ്റ്യൂട്ട് ഫോർ മെഡിക്കൽ സയൻസസ് ആൻഡ് ടെക്നോളജി പഠനം ആരംഭിച്ചു. ഇന്ത്യയിലെ മറ്റു ഗവേഷണ സ്ഥാപനങ്ങളും അമേരിക്കയുമായി സഹകരിച്ചാണ് പഠനം നടത്തുക.

ഗവേഷണം ഇന്ത്യ-യു എസ് പരിസ്ഥിതി – തൊഴിൽ ആരോഗ്യ സഹകരണ ഉടമ്പടിയുടെ ഭാഗമാണ്. വീടിനുള്ളിലെ വായു മലിനീകരണം കുറക്കുന്നത് വഴി ഹൃദയ പരിക്ഷീണത രോഗികളുടെ ആരോഗ്യത്തിൽ കാര്യമായ മെച്ചപെടലുകൾ വരുന്നുണ്ടോ എന്നതാണ് ഈ പഠനത്തിന്റെ പ്രധാന ലക്ഷ്യം.

ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് (AIMS) ന്യൂഡൽഹി, ദയാനന്ദ് മെഡിക്കൽ കോളേജ് (DMC) ലുധിയാന, ശ്രീ ചിത്ര തിരുന്നാൾ ഇൻസ്റ്റിറ്റ്യൂട്ട് ഫോർ മെഡിക്കൽ സയൻസസ് ആൻഡ് ടെക്നോളജി (SCTIMST) തിരുവനന്തപുരം എന്നിങ്ങനെ ഇന്ത്യയിലെ മൂന്ന് പ്രധാന മെഡിക്കൽ സെന്ററുകളിലാണ് ഈ പഠനം നടക്കുന്നത്. ഈ പഠനത്തിന്റെ ഭാഗമായി, കേരളത്തിലെ തിരുവനന്തപുരം, കൊല്ലം ജില്ലകളിലെ 10 ഹൃദയ പരിക്ഷീണതാ രോഗികളുടെ വീടുകളിൽ വായു ശുദ്ധീകരണ യന്ത്രങ്ങൾ (എയർ പ്യൂരിഫയറുകൾ)സ്ഥാപിച്ചിട്ടുണ്ട്. ഈ ജില്ലകളിലെ ആകെ 200 രോഗികളുടെ വീടുകളിൽ വായു ശുദ്ധീകരണ യന്ത്രങ്ങൾ സ്ഥാപിക്കാനാണ് ഉദ്ദേശിക്കുന്നത്.

പഠനത്തിന്‍റെ പ്രാധാന്യം : പൊതുജനാരോഗ്യ വീക്ഷണം

വായു മലിനീകരണം പൊതുവെ ഇന്ത്യയിലെ മുൻനിര നഗരങ്ങളിലാണ് പ്രധാന പ്രശ്നമായി കാണാക്കപ്പെട്ടിരുന്നത്. എന്നാൽ വീടിനുള്ളിലെ വായുമലിനീകരണവും അത്ര തന്നെ അപകടകരമാണ്. ഹൃദയരോഗമുള്ള രോഗികളെ പരിസ്ഥിതി വ്യതിയാനങ്ങൾ പ്രതികൂലമായി ബാധിയ്ക്കുന്നതിനാൽ ശുദ്ധമായ വായു ശ്വസിക്കുന്നത് മൂലം ആശുപത്രിവാസം, ഹൃദയസംബന്ധമായ സങ്കീർണതകൾ, മരണസാധ്യത എന്നിവ കുറക്കാൻ സഹായകരമാകുന്നു. ഈ പഠനം പൊതുജനാരോഗ്യ രംഗത്ത് വളരെയധികം പ്രാധാന്യമുള്ളതാണ്.

ഈ പഠനം വിജയകരമായാൽ, വീടിനുള്ളിലെ വായു ഗുണമേന്മയുടെ പ്രാധാന്യം കണക്കിലെടുത്ത് ഹൃദയപരിക്ഷീണതാ നിയന്ത്രിക്കാനുള്ള പുതിയ മാർഗനിർദേശങ്ങൾ രൂപപെടുന്നതിന് വഴി വെക്കാം. ഉയർന്ന അപകട സാധ്യതയുള്ള രോഗികൾക്ക് ചികിത്സയുടെ ഭാഗമായി വായു ശുദ്ധീകരണ യന്ത്രങ്ങൾ ഉൾപെടുത്താൻ ദേശീയ ആരോഗ്യനയങ്ങളെ സ്വാധീനിക്കാം.

ഈ പഠനത്തിന്‍റെ ഫലങ്ങൾ ഇന്ത്യയിലെ മാത്രമല്ല, ലോകമെമ്പാടുമുള്ള മലിനമായ പ്രദേശങ്ങളിൽ ജീവിക്കുന്ന ലക്ഷക്കണക്കിന് ആളുകൾക്ക് ഗുണം ചെയ്യും.

പഠനത്തിന്റെ സാധ്യതകൾ ഹൃദയരോഗം കാരണമുള്ള മരണനിരക്ക് ഇന്ത്യയിൽ കൂടുതലാണ്. അതിനാൽ നൂതന ചികിത്സ രീതികൾ അത്യാവശ്യമാണ്. ശുദ്ധവായു, ഹൃദയാരോഗ്യം എന്നിവ തമ്മിലുള്ള ബന്ധത്തിൽ ശ്രദ്ധ കേന്ദ്രീകരിക്കുന്ന ഈ ഗവേഷണം ഇന്ത്യയെ പൊതുജനാരോഗ്യത്തിന്റെ പുതിയ മേഖലയിലേക്ക് നയിച്ചേക്കും. പ്രിൻസിപ്പൽ ഇൻവെസ്റിഗേറ്റർ ഡോ ഹരികൃഷ്‌ണൻ എസ് ആണ് ശ്രീ ചിത്രയിൽ ഈ പ്രൊജക്റ്റ് നയിക്കുന്നത്. ഡോ ജീമോൻ, ഡോ സഞ്ജയ്, ഡോ ജ്യോതി വിജയ് എന്നിവർ സഹ പ്രിൻസിപ്പൽ ഇൻവെസ്റിഗേറ്റർമാരായി പ്രവർത്തിക്കും.