നിലവിൽ രണ്ട് സ്വകാര്യ ബസുകൾക്ക് കടന്നുപോകാൻ മാത്രമുള്ള ഇടമാണ് നഗരസഭാ ബസ് സ്റ്റാൻഡിന്റെ കവാടത്തിലുള്ളത്. മാർക്കറ്റ് ഇവിടെ സ്ഥാപിക്കുന്നതിലൂടെ ബസ് സ്റ്റാന്റിന്റെ ഇടുങ്ങിയ പ്രവേശന കവാടം അപകടം വിളിച്ചു വരുത്തുംവിധം മാറുമെന്ന് നാട്ടുകാർ പറയുന്നു. ദിവസവും 140ഓളം സ്വകാര്യബസുകൾ വന്നു പോകുന്ന സ്റ്റാൻഡിന് സമീപം മത്സ്യമാർക്കറ്റ് പ്രവർത്തിക്കുന്നത് പ്രായോഗികമല്ലെന്ന് വിവിധ സംഘടനകൾ അഭിപ്രായപ്പെട്ടു.
മതിയായ മാലിന്യ നിർമ്മാർജ്ജന സംവിധാനങ്ങളോ മലിനജലം ഒഴുക്കി വിടുന്നതിനുള്ള ക്രമീകരണങ്ങളോ ഷെഡ് നിർമ്മാണത്തിന് അനുബന്ധമായി ഇവിടെ നടത്തിയിട്ടില്ല. സമീപത്തെ വീടിനോട് ചേർന്ന് മലിനജല ശേഖരണത്തിനായി നഗരസഭ കുഴിയെടുത്തിരുന്നു.പൊല്യൂഷൻ കൺട്രോൾ ബോർഡിന്റെ നിബന്ധനകൾ പാലിക്കാതെ ഇത്തരത്തിലുള്ള പ്രവർത്തനം മൂലം സമീപത്തെ കിണറുകളിൽ മാലിന്യം പടരാൻ സാദ്ധ്യതയുണ്ടെന്നും സമീപത്ത് സ്ഥിതി ചെയ്യുന്ന ശ്രീകൃഷ്ണസ്വാമി ക്ഷേത്രത്തിന് ചുറ്റും ദുർഗന്ധം വ്യാപിക്കാൻ സാഹചര്യമുണ്ടാകുമെന്നും നാട്ടുകാർ പരാതിപ്പെടുന്നു. റെയിൽവേ സ്റ്റേഷനിൽ നിന്നും ജനാർദ്ദനസ്വാമി ക്ഷേത്രത്തിലേക്കും പാപനാശത്തേക്കും പോകുന്ന ഷോർട്ട് കട്ട് റോഡും ഇതിനോട് ചേർന്നാണ്. മാർക്കറ്റ് കൂടി ഇതിനോട് ചേർന്ന് പ്രവൃത്തിച്ചാൽ തങ്ങൾക്ക് കൂടുതൽ ബുദ്ധിമുട്ടുണ്ടാകുമെന്ന് റസിഡന്റ്സ് അസോസിയേഷൻ ഭാരവാഹികൾ പറയുന്നു. നഗരസഭ മാർക്കറ്റിനായി നോട്ടിഫൈ ചെയ്ത് അക്വെയർ ചെയ്ത സ്ഥലം ധന്യ സൂപ്പർ മാർക്കറ്റിന് സമീപമുണ്ട്. ഈ സ്ഥലം പാർക്കിംഗിന് വേണ്ടി നീക്കിയിട്ടിട്ടുള്ളതാണെങ്കിലും നിലവിൽ കാട് മൂടിക്കിടക്കുന്ന ഈ സ്ഥലം മാർക്കറ്റിനായി പരിഗണിക്കണമെന്നാണ് നാട്ടുകാരുടെ ആവശ്യം.
